BOBONARU, 09 Dezembru 2025 (TATOLI)-Autoridade Protesaun Sivíl (APC, sigla portugés) delegasaun territoriál munisípiu Bobonaru alerta ba komunidade sira atu hadook-an husi fatin risku sira hanesan mota-ninin no foho-lolon sira hodi prevene-an husi dezastre naturál.
Apelu ne’e hato’o husi Komandante APC Bobonaru, Zeca Michael Lopes, tanba daudaun ne’e tama ona tempu udan no anin-boot ne’ebé tinan-tinan sempre akontese dezastre naturál hanesan inundasaun, rai-halai, aimonu no seluk tan.
Notísia relevante: APC apoia materiál rekuperasaun ba vitima dezastre naturál 31 iha Bobonaru
“Alerta ba komunidade hotu-hotu ne’eb hela iha área risku, karik udan ho anin-boot buka fatin ne’ebé seguru”, nia aviza.
Zeca Lopes dehan durante ne’e APC identifika postu administrativu tolu hanesan Kailaku, Atabae no Balibó mak sai fatin risku ba indundasaun hanesan iha suku Purugua, Atudara, Hata’as no Batugadé iha aldeia Lotan.Enkuantu postu administrativu Lolotoe no Bobonaru risku ba rai-halai.
Atu prevene komunidade husi dezastre naturál, APC instala ona ekipamentu alerta antesipada “Toa” no establese ona Komisaun Jestaun Risku Desastre Suku (KJDS) iha suku 49 no falta Sanirin ne’ebé xefe suku mak koordenadór. Membru sira iha komisaun ne’e mak reprezentante veteranu, Ofisiál Polísia Suku (OPS), pesoál saúde, pesoál administrasaun suku, xefe aldeia no seluk tan.
APC mós destaka ona pontu fokál na’in-haat iha postu administrativu Kailaku no Bobonaru no tuir planu, tinan oin sei koloka mós ba postu sira seluk hanesan Lolotoe, Atabae no Balibó.
Hahú husi Janeiru to’o Novembru 2025, APC munisípiu fó apoia pakote emerjénsia ba família vítima afetada ba dezastre naturál hamutuk 112, ne’ebé mai ho tipu dezastre hanesan anin sobu uma 52, ahi han – 48, rai-halai 9, rai-lakan 1, ema mout iha mota 1, mout iha tasi 1. Husi totál vítima ne’ebé uma hetan estragu no simu ona apoiu rekuperasaun hamutuk 31.
Notísia relevante: Vítima inundasaun iha Miguir simu apoiu emerjénsia
Jornalista: Sergio da Cruz
Editora: Maria Auxiliadora
