DILI, 09 Marsu 2026 (TATOLI)—Autoridade Protesaun Sivil (APC, sigla portugéz) no empreza Similie husi Indonezia formaliza ona kooperasaun serbisu hodi apoiu ba transmisaun informasaun ho aparellu modernu ba sistema alerta sedu no fó formasaun ba komunidade atu hadook-an husi fatin ba risku dezastre bainhira ho modu dezastre no inundasaun.
“Autoridede Protesaun Sivil ohin ami selebra tan akordu ida ho Smart Traning parseiru dezenvolvimentu ida-ne’ebé ami-nia atensaun ne’e ba liu sistema alerta sedu kona-ba dezastre naturais,” Prezidente APC, Jesuino Carvalho, hato’o ba Jornalista sira iha salaun APC, Kaikoli, Segunda ne’e.
Nu’udar Prezidente Autoridade Protesaun Sivíl ba Vikeke, foin lalais ne’e inaugura ona sentru evakuasaun no fatin ida atu utiliza hanesan aparellu ne’ebé bele fó mensajen alerta sedu ba komunidade.
“Aparellu ne’e modernu tebes ba sistema alerta sedu liuhusi mensajen. Entaun ida-ne’e Similie mak haree ba asuntu ne’e, sira ba monta aparellu iha area rurál ne’ebé maka risku ba dezastre, entaun nu’udar Autoridade ba Protesaun Sivil, nu’udar instituisaun Governu ne’ebé mak serbisu ba Protesau Sivil, liuliu haree liu ba dezastre naturál, ami agradese ba Similie nia inisiativa no hanoin hodi fó apoiu ba Governu, liuliu redusaun ba risku dezastre iha ita-nia komunidade,” nia akresenta.
Notísia relevante : APC-Bombeiru hasai sedimentasaun iha Postu Integradu Mota-Ain
APC no Similie antes ne’e hala’o ona kooperasaun liuhusi kapasitasaun pesoál APC, Autoridade lokál no komunidade atubele iha koñesimetu di’ak ba sistema ne’ebé daudaun aplika hela iha komunidade nia le’et.
“Prazu ba kontratu serbisu hamutuk laiha, akordu ne’e ami bele revee kuandu buat ruma ladún di’ak, kuandu buat ruma la relevante ona ami bele hadi’a. Iha durasaun ita bele termina katak pesoál ne’ebé uluk asina ne’e dalaruma nia eleva fali funsaun seluk karik, entaun ita bele halo akordu foun ida para fortifika fali akordu ne’e ba oin,” nia katak.
Iha fatin hanesan, CEO Similie, Ana Paula da Costa Xavier, hateten, Similie nu’udar empreza sosiál ne’ebé serbisu barak iha dezenvolvimentu teknolojia ba alerta sedu.
“Durante ne’e ami fó fomasaun ba pesoál APC no komunidade atu koñese sistema alerta sedu ne’e oinsá atu haree kona-ba atu simu mensajen tuir tempu no sistema alerta sedu,” nia tenik.
Similie realiza mós formasaun ba komunidade vulnerável sira iha munisípiu no foin daudaun ne’e fó formasaun ba abitante na’in-80 ba sistema alerta sedu, oinsá sensibiliza hodi hadook-an husi fatin risku ba dezastre naturál.
Aleinde ne’e, Similie nu’udar empreza teknolojia klimátika no APC ofisialmente asina ona Memorandu Entendimentu ida atu hametin sistema alerta antisipada nasionál no redusaun risku dezastre.
Tuir akordu tinan ida-ne’e parte rua sei estabelese enkuadramentu ida ba kolaborasaun téknika. Parseria ne’e foka ba troka dadus meteorolójiku no idrojeolójiku sira hodi hadi’a monitorizasaun no análize ba perigu naturál sira hanesan inundasaun no rai-monu.
Similie sei utiliza ninia infraestrutura espesializada inklui estasaun meteorolójiku automátiku sira (AWS) no ninia portál Multi-Hazard Early Warning System (MHEWS) bolu Parabl hodi fornese dadus no alerta automatizadu sira iha tempu-reál ba Governu no parte interesada jerál sira. APC, hanesan entidade nasionál ba resposta emerjénsia, sei integra koñesimentu teknolojiku sira-ne’e iha sira ninia planeamentu kontinjénsia, avaliasaun risku, no inisiativa sira ba sensibilizasaun públika nian.
“Ami-nia objetivu maka atu liga solusaun inovadora sira, ne’ebé adapta ba jestaun no análize dadus ho misaun esensiál protesaun sivil nian,” nia hato’o.
Ana Paula dehan, esforsu konjuntu kolaborasaun ida-ne’e mós inklui kapasitasaun téknika no peskiza hodi garante Timor-Leste nia estratejia.
Jornalista : Natalino Costa
Editora : Julia Chatarina
