Ekipa APC halo ona intervensaun ba inundasaun iha Mota-Ain no Batugade
DILI, 09 Marsu 2026 (TATOLI)—Ekipa Autoridade Protesaun Sivil (APC, sigla portugéz) halo ona intervensaun ba impaktu inundasaun iha área Mota-ain no Batugade.
Prezidente APC, Jesuíno dos Reis Matos Carvalho, haktuir, udan ho intensidade boot iha Domingu (08/03) iha Mota-Ain no Batugade rezulta iha fatin tama ponte ne’ebé sai hanesan fronteira entre Timor-Leste no Indonézia ne’e nakonu hodi halo bee suli tama tiha postu fronteira Batugade.
“Udan ida-ne’e nu’udar siklone ne’ebé akontese mai husi Indonézia no Filipina, ninia iis to’o ita, horisehik akontese iha Batugade tan intensidade udan ne’e maka’as iha foho sulin mai ponte. Tuir loloos ne’e sulin loos ba de’it maibé tanba ai sira ne’ebé bee lori kait metin iha ponte ne’e, entaun ne’e la tuun nune’e tenke nakonu,” Jesuino Carvalho hato’o ba Jornalista sira iha ninia knaar fatin, Kaikoli, Segunda ne’e.
Notísia relevante : Prezidente APC propoin Governu autoriza kuarentina Tasi-tolu sai provizóriu ba sentru akollimentu
Nia dehan, hafoin akontesimentu ne’e ekipa Bombeiru bá kedan hodi hasai tiha ai sira ne’e no normaliza korente ne’e, enkuantu Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P) inklui ekipamentu pezadu bá halo ona normalizasaun iha fatin ne’e.
“Ita-nia ekipa horisehik bá ona iha ne’ebá, Sekretáriu Estadu Domingos Mariano Reis mós bá filafali hodi haree. Horisehik ami-nia Bombeiru iha ne’ebá halo ona apoiu ba ida-ne’e depois ami rekomenda depois oinsá Indonézia halo konkordánsia ho ita-nia ekipa sira husi Obras Públika para estuda tok atu antisipa bainhira akontese fali inundasaun hanesan orsehik ne’e,” nia katak.
Jornalista : Natalino Costa
Editora : Julia Chatarina
