Prezidente APC propoin Governu autoriza kuarentina Tasi-tolu sai provizóriu ba sentru akollimentu
DILI, 09 Marsu 2026 (TATOLI)—Prezidente Autoridade Protesaun Sivíl (APC, sigla portugéz), Jesuíno dos Reis Matos Carvalho, propoin ba Governu atu autoriza fatin kuarentina Tasi-tolu hodi sai provizóriu ba sentru akollimentu, nune’e bainhira komunidade iha Dili afetadu ba dezastre naturál bele asegura iha fatin ne’e.
“Ha’u uluk kedas husu Señór Primeiru-Ministru, karik bele fatin Kuarentena hodi ne’e fó netik ba ami para bele prepara ba fatin evakuasaun hodi halo evakuasaun temporária ba sidadaun sira ne’ebé mak afeta ba inundasaun iha tempu udan,” Prezidente APC hato’o ba Jornalista sira iha ninia knaar fatin, Kaikoli, Segunda ne’e.
Notísia relevante : APC no Similie formaliza kooperasaun kona-ba sistema alerta sedu ba risku dezastre
Nia dehan, foin daudaun iha udan boot, iha parte Kaikoli iha membru uma-kain 126 mak evakua mai edifísiu APC iha Kaikoli tanba afetadu ba inundasaun.
“Ita evakua tiha sira mai, fó apoiu asisténsia ba sira hanesan ai-han no sasán balun hanesan biti, ne’ebé sira uza hodi toba kalan ida iha ne’e to’o sira bá fali sira-nia uma,” nia akresenta.
APC foin lalais ne’e fó apoiu ba família afetadu inundasaun iha área Bairru Pité no Vila Verde.
Ho situasaun sira ne’e, APC halo koordenasaun ho Sekretaria Estadu Terra no Priopriedade atu buka rai hodi instala sentru akollimentu ne’ebé kompleta ho armazenamentu ai-han.
“Ida-ne’e importante tebes tanba bainhira iha inundasaun mak bele evakua komunidade afetadu sira ba fatin ne’e,” nia katak.
Jornalista : Natalino Costa
Editora : Julia Chatarina
