OEKUSI, 09 Marsu 2026 (TATOLI) – Koordenadór Zona Ekonomia Espesiál Dezenvolvimentu Oekusi Ambeno (ZEEDOA), Herculano de Sousa, afirma, prontu simu desizaun husi Governu Sentrál atu halo mudansa ba Rejiaun Administrativa Espesiál Oekusi Ambeno (RAEOA).
“Ita respeita desizaun husi Governu Sentrál, tanba iha intensaun di’ak atu-bele hadi’a prestasaun serbisu administrativu iha rejiaun ida-ne’e, tanba ne’e maka, ita laiha fatin atu-bele kontra desizaun ida-ne’e, ita tenke obedese no halo tuir,” nia hateten ba jornalista sira iha Oekusi, ohin.
Membru autoridade ne’e konsidera katak desizaun ne’e ho fiar ida katak saida de’it mak Governu Sentrál deside ona, ne’e iha nia objetivu di’ak no intensaun di’ak atu ba oin ne’e, serbisu hothotu bele la’o tuir padraun ne’ebé maka Governu hatuur tiha ona.
Notísia relevante:PA RAEOA simu ona karta husi Governu, mandatu sei termina iha 31 Marsu 2026
Iha biban ne’e, nia esplika kona-ba konteudu husi karta ne’ebé atribui husi Governu Sentrál, liuhusi entidade tuteladu RAEOA, Primeiru-Ministru (PM), Kay Rala Xanana Gusmão, laiha termu ezonerasaun.
“Ha’u labele temi karta ne’e ezonerasaun, tanba iha karta ne’e rasik, laiha termu liafuan ezonerasaun: laiha! Tanba ne’e, maka ha’u husu ba ita hotu, labele interpreta ida-ne’e, maibé karta ne’e nia intensaun atu informa de’it katak, estrutura tranzitóriu ne’e, sira-nia serbisu tenke hotu iha 31 Marsu 2026 inklui mós funsionáriu kontratadu, termu-sertu sira, asesór sira mós tenke para. Agora atu ezonera ou la ezonera, ne’e la’ós kestaun iha ne’e, maibé karta ne’e informa de’it katak serbisu autoridade atuál nian,” nia esplika.
Koordenadór ZEEDOA ne’e konfirma tan katak, antes ne’e mós Primeiru-Ministru (PM) ho Ministériu relevante sira, rekolla ona informasaun iha kada instituisaun, nu’udar baze ba kompozisaun estruturua definitivu.
“Ita fiar nafatin ba Governu Sentrál, sira mai vizita Oekusi dala-hira ona, Primeiru-Ministru (PM) rasik mai beibeik iha Oekusi ho nia ekipa sira husi ministériu relevante sira, entaun ho informasaun sira-ne’ebé hetan husi ita nu’udar autoridade tranzitoriu, ha’u fiar katak informasaun sira-ne’e, sei tulun sira atu bele foti desizaun ida di’ak kona-ba komposizaun estrutura definitivu mak sei mai,” nia afirma.
Notísia relevante:PA RAEOA klarifika: “La’ós karta ezonerasaun”
Rekorde fali katak, Governu nomea autoridade trazitóriu RAEOA lidera husi Régio da Cruz Salu iha loron 01 Setembru 2025 hodi garante funsionamentu administrasaun RAEOA to’o 31 Dezembru 2025, hafoin ne’e Konsellu-Ministru deside hodi estende tan sira-nia mandatu tinan ida, hahú husi 01 Janeiru to’o 31 Dezembru 2026, maibé daudaun ne’e simu ona karta husi Governu Sentrál katak mandatu tenke termina iha loron 31 Marsu 2026.
Notísia relevante:Posibilidade, nomeasaun estrutura definitiva RAEOA maioria Oekusi-oan
Jornalista: Abílio Elo Nini
Editór: Rafael Ximenes de A. Belo
