OEKUSI, 06 Marsu 2026 (TATOLI) – Ministru Administrasaun Estatál (MAE), Tomas do Rosário Cabral, sesta ohin, fó sai, katak, Konsellu-Ministru mak nomea estrutura definitiva ba Rejiaun Administrativa Espesiál Oekusi Ambeno (RAEOA) no maioria sei fó kompeténsia ba Oekusi-oan.
Notísia relevante:PA RAEOA simu ona karta husi Governu, mandatu sei termina iha 31 Marsu 2026
Ministru Tomas Cabral, informa, hafoin hala’o reuniaun ho Autoridade RAEOA tranzitória, autoridade komunitáriu no funsionáriu sira iha salaun Álfandega Palaban Oekusi, ohin.
“Ita sei fó fali ba Oekusi-oan sira mak atu organiza governasaun ho delegasaun kompeténsia ne’ebé iha. MAE laiha planu mesak tanba planu ne’e sei mai husi Konsellu-Ministru tanba proposta hothotu tenke ba hotu Primeiru-Ministru, depois Primeiru-Ministru mak aprezenta iha Konsellu-Ministru detallu, signifika polítika ne’e ida de’it,” nia hateten iha Oekusi, ohin.
Governante ne’e konfirma, reuniaun ohin ne’e, Oekusi-oan sira komprende ona katak, governasaun sei fó fila fali ba Oekusi-oan, rai na’in-rasik mak tenke jere administrasaun iha RAEOA.
“Tan ne’e ha’u-nia rekomendasaun, ha’u hato’o ona, tenke aprende rona, ko’alia ba malu, konsellu-konsultivu rejionál tenke la’o, nune’e bele deskuti diferénsia ideia no sai ideia ida de’it ba RAEOA,” nia fó hanoin.
Notísia relevante:PA RAEOA klarifika: “La’ós karta ezonerasaun”
Tuir nia, iha estrutura definitiva sei akontese iha fulan Abríl 2026, bele aumenta Sekretáriu Rejionál na’in-tolu no bele liu, tanba proposta nomeasaun sei mai husi Konsellu-Ministru tuir lei ne’ebé iha, ne’ebé maioria Oekusi-oan hotu.
Bainhira aprezenta ba Konsellu-Ministru ba nomeasaun foun, sei fó kedas prazu ba estrutura definitive fulan neen, atu elabora Planu Estratéjiku Dezenvolvimentu Rejionál ba tinan lima,.
“Semak hakarak mai, sé sira (Oekusi-oan) iha hela, kapasidade no rekursu iha hela, agora atu kombina rekursu tenke uza rekursu sira-ne’ebé iha,” nia afirma.
Maibé nia dehan, estrutura tranzitóriu atuál, sei halo reajustamentu tuir dezenpeñu serbisu no rezultadu aváliasaun ne’ebé antes ne’e ekipa aváliadóra rekolla ona.
“Ita sei haree sira idak-idak, tau tuir nia kompeténsia ne’ebé iha, ita presiza mak prestasaun serbisu, sei ita tau ema sala mós serbisu lala’o, di’akliu ita konsulta no haree koloka ema tuir área ne’ebé nia iha, ne’ebé ohin ita foin mai, ita tenke haree tanba prazu hela fulan ida-ne’e, ita bele iha ona dadus fulan oin (Abríl) bele la’o ona, tanba proposta sei lori ba Konsellu-Ministru,” nia hateten.
Notísia relevante:PA RAEOA enkontru urjente ho membru autoridade prepara relatóriu ‘hand-over’
Iha biban ne’e Prezidente Autoridade Tranzitóriu RAEOA, Régio da Cruz Salu, informa daudaun membru autoridade tranzitóriu prepara ona relatóriu nune’e bele entrega ba estrutura definitiva.
“Tenke Oekusi-oan duni, tanba faze ida-ne’e, Primeiru-Ministru rasik hateten katak, agora Oekusi-oan sira mak lidera sira-nia rain, entaun relatóriu ami tenke prepara atu entrega, sela’e hanesan uluk ha’u mai iha fulan Setembru 2025, transferénsia data saida de’it atu ha’u simu laiha, ne’ebé agora tenkeser, tantu ha’u bele hateten estrutura foun ne’e orang-orang yang sama la’os ema foun, kuadu iha ema foun parese Sekretáriu Rejionál na’in-tolu ne’e,” nia hateten.
Notísia relevante:Veteranu Oekusi prefere re-estruturasaun ba estrutura tranzitória RAEOA no hili figura akumulativa
Rekorde fali katak, Governu nomea autoridade trazitória RAEOA lidera hosi Régio da Cruz Salu iha loron 01 Setembru 2025 hodi garante funsionamentu administrasaun RAEOA to’o 31 Dezembru 2025, hafoin ne’e Konsellu-Ministru deside hodi estende tan sira-nia mandatu tinan ida, hahú husi 01 Janeiru to’o 31 Dezembru 2026, maibé daudaun ne’e simu ona karta husi Governu Sentrál katak, mandatu tenke termina iha loron 31 Marsu 2026.
Jornalista: Abílio Elo Nini
Editór: Rafael Ximenes de A. Belo
