OEKUSI, 27 Fevereiru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, kinta ne’e, konvoka enkontru urjente ho membru Autoridade sira no órgaun deliberativu hodi disemina karta husi enkarregadu entidade tuteladu no superintendente RAEOA kona-ba reforma orgánika no sesaun mandatu ba funsionáriu kontratu termu-sertu sira, to’o de’it loron 31 Marsu 2026, no prepara dadus ba seremónia ‘hand-over’ ka entrega.
Karta ofisiál ne’ebé Ajénsia Tatoli,I.P, asesu sesta ne’e, ho númeru referénsia, 02/GPA-RAEOA TL/II/2026, loron 25 Fevereiru 2026.
“Konforme ho dekretu-lei númeru 5/2015, 22 Janeiru, alterada husi dekretu-lei númeru 93/2022, 22 Dezembru, no dekretu-lei númeru 01/2026, de 03 de Fevereiru, ne’ebé aprova Estatutu RAEOA, ho nia dispozisaun legál ne’ebé aplikável, iha kapasidade hanesan Prezidente Autoridade RAEOA, liuhusi meiu ida-ne’e, ‘Konvoka Membru Autoridade Orgaun Deliberativu RAEOA’, atu partisipa iha reuniaun Autoridade Orgaun Deliberativu RAEOA nian,” sita iha karta ofisiál ne’ebé Ajénsia Tatoli,I.P asesu iha Gabinete Prezidente Autoridade RAEOA, sesta ohin.
Notísia relevante:PA RAEOA simu ona karta husi Governu, mandatu sei termina iha 31 Marsu 2026
Entretantu, iha enkontru realiza iha kinta-feira 26 Fevereiru 2026, partisipa másima hosi Diretór Diresaun Rejionál sira hotu inklui Xefe Departamentu sira, iha oras tuku 14h00 lorokraik iha salaun Gabinete Prezidente Autoridade RAEOA.
Ajénda ofisiál ne’ebé sai diskusaun iha enkontru ho membru Autoridade sira no órgaun deliberativu ho asuntu tolu mak hanesan:
- Disemina karta husi enkarregadu entidade tutelár no superintendente RAEOA kona-ba reforma orgánika RAEOA no sessaun mandatu ba kontratu termu-sertu RAEOA determina ramata iha loron 31 Marsu 2026.
- Rekollamentu dadus ‘hand-over’ no implementasaun nova orgânika RAEOA;
- Kampaña públiku RAEOA ba eliminasaun kazu dengue
“Konvite Konvokatóriu ida-ne’e ba de’it membru Autoridade RAEOA, no enkontru ne’e restritivu sein akompañamentu,” afirma iha karta ofisiál ne’e.
Notísia relevante:PM Xanana atribui prioridade neen ba PA RAEOA ezekuta durante fulan tolu
Antes ne’e, iha reuniaun Konsellu Ministru, kuarta (27 Agostu 2025) ne’e, Governu liuhusi reuniaun Konsellu-Ministru aprova projetu rezolusaun ba ezonera estrutura hahú husi Prezidente no membru Autoridade Rejiaun Administrativa Espesiál Oekusi Ambeno (RAEOA) iha 31 Agostu 2025.
Durante reuniaun ne’e, Primeiru-Ministru (PM) Kay Rala Xanana Gusmão, aprezenta rezolusaun kona-ba Rejiaun Administrativa Espesiál Oekusi Ambeno (RAEOA) atu disolve komisaun ezekutiva ho hanoin atu estabelese Zona Ekonómika Espesiál Dezenvolvimentu Oekusi Ambenu (ZEEDOA).
Iha dokumentu ofisiál portál Governu deklara katak, Governu sei ezonera Prezidente no membru autoridade RAEOA nian hahu iha 31 Agostu 2025 no nomea estrutura foun ida hodi garante kontinuidade administrasaun nian hahú iha 01 Setembru 2025.
Aleinde ne’e, Governu mos nomea hotu estrutura husi kargu diresaun no xefia sira iha Rejiaun Administrativa Espesiál Oekusi Ambeno (RAEOA) mak hanesan;
Domingos Punef asume knaar nu’udar Diretár-Jerál Rejionál; José Tanessib Anuno nu’udar Diretór Rejionál Administrasaun; Augusto de Fátima Efi nu’udar Diretór Rejionál Planeamentu no Aprovisionamentu; Amâncio Aguido Punef nu’udar Diretór Rejionál Finansas.
Merita Marques Caunan Lafo nu’udar Diretora Rejionál Saúde; Vicêncio Cono nu’udar Diretór Rejionál da Edukasaun no Solidariedade Sosiál, José Oki nu’udar Diretór Rejionál Agrikultura; Orlando Quelo nu’udar Diretór Rejionál Komérsiu no Indústria.
Nune’e mós Governu nomea Remígio Nuno Sila nu’udar Diretór Rejionál Infraestruturas; Domingos de Almeida nu’udar Diretór Rejionál Transporte no Komunikasaun; Carlos de Fátima de Almeida nu’udar Diretór Rejionál Juventude no Desportu; Anastásia Eni nu’udar Diretora Rejionál Turizmu, Arte no Kultura; José Ase Neno Colo, nu’udar Diretór Rejionál Terras no Propriedade no Herculano de Sousa mak asume kargu hanesan Koordenadór ba Implementasaun Zona Ekonómika Espesiál Dezenvolvimentu Oekusi Ambeno (ZEEDOA).
Notísia relevante:KM aprova dekretu-lei reestrutura estatutu RAEOA no ZEESM
Jornalista: Abílio Elo Nini
Editór: Rafael Ximenes de A. Belo
