Presiza kria fatin estasionamentu iha BNCTL sukursál Oekusi nia oin
OEKUSI, 10 Marsu 2026 (TATOLI) – Diretór Komisaun Nasionál Eleisaun (CNE) Rejiaun Administrativa Espesiál Oekusi Ambeno (RAEOA), Tomas Oqui Meta, rekomenda ba Sekretáriu Estadu Asuntu Toponímia Organizasaun Urbana (SEATOU), atu koordena ho Banku Nasionál Timor-Leste (BNCTL) sukursál Oekusi, atu kria fatin estasionamentu bainhira asesu ba mákina ATM.
Tomas Meta, impoin nia rekomendasaun ne’e, bainhira hala’o dialogu ho ekipa Sekretáriu Estadu Asuntu Toponímia Organizasaun Urbana (SEATOU), iha salaun administrasaun Numbei kona-ba enkuadramentu legál ba Ordenamentu Territóriu, Serbisu Ijiéne Ordén Públika, Organizasaun Urbana no Jestaun ba Zona Estensionamentu Durasaun Limitada (ZEDL).
“Kona-ba estasionamentu, ha’u observa no la konkorda liliu mákina ATM BNCTL, tanba husi banku monta mákina ATM iha banku oin, maibé laiha fatin estasionamentu, no fatin sinál tranzitu atu labele para transporte, entaun ita ba para fali iha fatin seluk mak la’o ain sa’e mai mak foti osan. Ne’e sira-nia banku kria tiha maib’e laiha fatin estasionamentu, ne’ebé ami husu SEATOU sei bele, ba haree direita oinsa bele muda ba fatin seluk,” nia hateten iha salaun administrasaun Numbei, ohin.
Tuir nia, loloos instala iha fatin ne’ebé livre no luan atu para karreta no motorizada, tanba dala-barak, sidadaun balu hetan prende husi Polísia Nasionál Timor-Leste (PNTL) sesaun tranzitu, bainhira para sala atu foti osan iha mákina ATM ne’e.
“Ita foti osan mós kontribui ba banku, entaun banku mós tenke kria fatin dignu ba sidadaun sira, tanba it aba para karreta iha tasi-ibun la’o to’o minute 20 mak foin mai to’o ATM ne’e atu foti osan, ne’eb’e SEATOU iha ne’e, aban ita bele ba observa atu ko’alia sira atu muda tiha ba fatin seluk,” nia rekomenda.
Notísia relevante:SEATOU introdús enkuadramentu legál haat iha Oekusi atu re-konfirma nia implementasaun
Hatan ba rekomendasaun ne’e, Diretór Nasionál Ijiéne Ordén Públika husi SEATOU, Egas José Caetano, sei koordena ho Sekretáriu Estadu Asuntu Toponímia Organizasaun Urbana (SEATOU), Germano Santa Brites, atu observa tanba rekomendasaun sira-ne’e preokupasaun públiku nian.
“Aban, suaselénsia sei to’o Oekusi, depois makita informa, rekomendasaun sira-ne’e, maibé buat hothotu, uma-na’in ka Autoridade RAEOA mak sei lori ita atu ba fatin ne’ebé siira identifika ona, maibé kona-ba asuntu ne’e, ha’u sei informa atu haree,” nia hateten.
Jornalista: Abílio Elo Nini
Editór: Rafael Ximenes de A. Belo
