VIKEKE, 10 Marsu 2026 (TATOLI)—Xefe Suku Ossú de Cima, Postu Administrativu Ossú, Munisípiu Vikeke, Celestino M. de Carvalho, relata ekipa Institutu Jestaun Ekipamentu Apoiu Dezenvolimentu Infraestutura, Institutu Públiku (IGEADI, I.P.) daudaun ne’e kontinua normaliza estrada husi Assalaitula nian ne’ebé besik konklui ona.
“Kona-ba normalizasaun estrada husi pontu entrada Assalaitula agora progresu servisu ne’e liu ona iha área Larigutu nian. Ne’ebé, ita haree pelumenus estrada sira ku’ak ne’e laiha ona. Fasilita ona ita-nia populasaun nia movimentu entre Baukau bá Dili no Vikeke ne’e di’ak ona,” Celestino ba TATOLI iha resintu Munisípiu Vikeke, Tersa ne’e.
Nia hatutan autoridade sira sempre akompaña servisu normalizasaun estrada parte Assalaitula to’o Ossú Vila ne’ebé kilómetru ualu (8) ne’e.
Notísia relevante: IGEADI destaka ekipamentu pezadu normaliza estrada Asalaitula-Ossú
Iha fatin ketak, Koordernadór Infraestrutura Ministériu Obra Públika (MOP) Munisípiu Vikeke, Mario Ângelo Menezes, haktuir estrada husi Assalaitula nian ne’ebé IGEADE halo normaliza ne’e sei konklui iha fulan ida-ne’e.
“Normalizasaun ne’e atinje ona kilómetru hitu (7), ne’ebé ita haree iha fulan ida-ne’e IGEADI bele finaliza ona,” nia hato’o.
Entretantu, estrada husi Assalaitula bá Postu Ossú ekipa IGEADI hahú halo normaliza iha fulan-Fevereiru liubá.
Jornalista: Vitorino Lopes da Costa
Editór: Xisto Freitas da Piedade
