DILI, 10 Marsu 2026 (TATOLI)-Parlamentu Nasionál aprova iha finál globál proposta Lei númeru 21/VI(2a)-Pestisida ho votu unanimidade.
Iha deklarasaun votu, Xefe bankada Partidu Libertasaun Populár (PLP), Maria Angelina Sarmento, hateten a favór ba lei ida-ne’e tanba importante tebes ba país, liuliu atu ajuda órgaun reguladór sira haree didi’ak distribuisaun pestisida sira ne’ebé barak iha rai-laran no laiha kontrolu.
“Ami husu ona atu providensia mós lista kona-ba pestisida sira ne’ebé tama iha kategória tolu ne’ebé identifika iha lei, hodi ajuda órgaun reguladora no benefisiáriu iha prosesu rejistu, kontrolu ba implementasaun pestisida ne’ebé atu uza iha ita-nia rai”, Angelina hato’o.
Antes ne’e, Prezidente Komisaun Dne’ebé trata Asuntu Ekonomia no Dezenvolvimentu, Ricardo Baptista, husu ba Governu atu kria tan dekretu-lei ida hodi regula marka pestisida hotu ne’ebé utiliza iha Timor-Leste.
Tanba iha proposta lei ne’e ko’alia liu oinsá atu regula nia prosesu, produsaun, transportasaun, armazenamentu, merkadu no utilizasaun. “Ko’alia kona-ba marka espesífika ne’e sei iha dekretu-lei ne’ebé parte Governu mak sei halo”, nia hateten.
Proposta lei ne’e aprezenta husi Ministériu Agrikultura, Pekuária, Peska no Floresta (MAPPF) ho objetivu atu regula, iha territóriu nasionál tomak, lisensiamentu, importasaun no esportasaun, produsaun, fa’an no distribuisaun, utilizasaun, embalajen no soe pestisida sira, inklui pestisida agríkola sira, iha faze hotuhotu husi sira-nia siklu moris.
Notísia relevante: https://tatoli.tl/2026/02/27/governu-presiza-kria-dekretu-lei-hodi-regula-marka-pestisida/
Jornalista: Nelson de Sousa
Editora: Maria Auxiliadora
