BOBONARU, 11 Marsu 2026 (TATOLI)-Sentru Karau Timor Susubeen (KTS) Korluli, iha suku Ritabou, postu administrativu Maliana, munisípiu Bobonaru, simu Karau Timór 11 husi Ministeriu Agrikultura, Pekuária, Peska no Floresta (MAPPF) no haki’ak kuaze tinan ida-resin, maibé karau-inan tolu mak mate.
“Ita simu karau 11, inan 10, aman ida, maibé iha tinan kotu finadu ne’e karau-inan tolu mak mate, agora hela de’it ualu”, Xefe Seksaun KTS Korluli, Adérito do Santos, informa ba jornalista sira, ohin.
Antigu Diretór Servisu Munisipál Agrikultura Munisípiu Bobonaru ne’e saliente katak sentru ne’e mós kria ona tanke no to’os iha rai ektare 10 hodi kuda hahán karau nia hanesan Lamtoro, Bafo Kayrala, Batar Noi-Mutin no seluk tan.
Daudaun ne’e karau-inan tolu mak kabuk ona hodi prepara ba faze ida prodús karau susun-been. “Atu prodús karau susun-been ne’e peritu sira mak hatene liu, depois orsida ami sei relata ba diresaun nasionál para mai haree, tratamentu oinsá, pakan ne’e fó oinsá”, dehan.
Sentru ne’e mós hasoru difikuldade tanba iha de’it funsionáriu na’in-tolu de’it. “Ita presiza rekursu maibé ita halo jestaun sira shift de’it para bele tama troka malu, más ita presiza tan rekursu, tanba inan hira ne’e hahoris tan nia nesesidade ne’e aumenta tan”, katak.
Sentru Produsaun Karau Timor Susu-Been hanesan programa pilotu Governu nian atu iha futuru bele fornese mós susubeen ba Programa Merenda Eskolár hodi tulun labarik sira-nia dezenvolvimentu.
Sentru KTS ne’e establese iha munisípiu lima hanesan Dotik-Manufahi, Pato-Lautein, Ratahu-Vikeke, Korluli-Bobonaru no Natarbora-Manatutu.
Notísia relevante: Ministériu Agrikultura sosa karau susubeen 50 hodi distribui ba sentru pekuáriu
Jornalista: Sergio da Cruz
Editora: Maria Auxiliadora
