DILI, 12 Marsu 2026 (TATOLI)–Komandu Jerál Polísia Nasionál Timor-Leste (PNTL) liuhusi Komisáriu Jerál Polísia, Henrique da Costa no Segundu Komandante Jerál, Komisáriu Pedro Belo, Kinta ne’e, lidera enkontru hodi fahe livru Orsamentu Jerál Estadu (OJE) 2026 ba Komandante Komandu Munisípiu sira hotu inklui kargu Xefia sira.
Komandante Administrasaun Komandu Jerál PNTL, Superintendente Xefe José Soares, hateten, Komandu Jerál PNTL konvoka enkontru ho Komandante Komandu Munisípiu, Komandante Unidade, Diretór, Xefe Departamentu no Komandante Supervizasun sira atu fahe livru osamentál 2026 hodi halo ezekusaun osan tuir saida mak hakerek ona iha livru orsmentál.
“Totál orsamentu ba tinan ida-ne’e iha millaun $49 husi osan ne’e saláriu no vensimentu, bens no servisu iha millaun $43, no kapitál menór millaun $6. Nune’e, liuhusi fahe livru orsamentu Komandante Munisípiu sira, Komandante Unidade inklui Diresaun sira bele hatene koloka osan ne’e tuir livru orsamentál nian,” José Soares hato’o ba Jornalista sira hafoin enkontru ho Komandante Munisípiu sira iha Komandu Jerál PNTL Kaikoli, Kinta ne’e.
Notísia relevante : PNTL nia oan na’in-71 okupa númeru kiik iha lista rekrutamentu membru foun
Nia dehan, orsamentu millaun $6 sei uza ba serbisu operasionál sira hanesan konbustível ba karreta PNTL, akuzasaun ba karreta operasionál no fasilidade PNTL nian atu garante serbisu institusaun bele la’o di’ak nafatin no bele garante nafatin orden públika hodi garante estabilidade iha Timor-Leste
“Ohin Komandu Jerál husu para Komandante Munisípiu sira, Komandante Unidade no Diretór inklui Komandante Seksaun sira atu uza ida-ne’e ho di’ak,” nia akresenta.
Reuniaun ne’e Komandante Munisípiu no membru Polísia atu kontinua serbí povu no nasaun ho responsabilidade.
“Ohin Komandu Jerál mós husu atu membru Polísia kontinua hatudu serbisu di’ak hodi serbí povu no nasaun,” nia katak.
Jornalista : Natalino Costa
Editora : Julia Chatarina
