DILI, 12 Marsu 2026 (TATOLI) – Komisaun A iha Parlamentu Nasionál ne’ebé trata Asuntu Konstitusionál prepara ona ezbosu Lei Sibernétika hodi halo diskusaun.
Prezidente Komisaun A, Natalino dos Santos, hateten Komisaun hein Governu no to’o fulan-Abríl mak seidauk submete proposta lei ne’e maka sei avansa ho projetu Lei Sibernétika hodi submete ba meza Parlamentu hodi bele inísia prosesu tuirmai.
“Lei Sibernétika ne’e Ministru Justisa hateten atu [lori] bá ona Konsellu Ministru. Agora, depende maibé Komisaun A antesipadamente prepara hela ezbosu, tanba Komisaun tinan ne’e fó prioridade ba Lei Sibernétika”, nia hateten iha Parlamentu, ohin.
Antes ne’e, Komisaun halo ona estudu komparativu iha Portugál hodi hasoru entidade lubun atu buka esperiénsia, koñesimentu, abilidade relasiona ho Lei Seguransa Sibernétika ne’ebé liga liu ba asuntu tékniku. Ida-ne’e sai referénsia ba deputadu sira atu trata lejizlasaun referida.
Tanba Timor-Leste presiza lejizlasaun ne’e ba prosesu transformasaun dijitál no seguransa iha setór dijitál nian.
Notísia relevante: https://tatoli.tl/2026/01/19/bankada-cnrt-ezije-aprezentasaun-urjensia-lei-sibernetika-hodi-kontrola-id-falsa/
Jornalista: Nelson de Sousa
Editora: Maria Auxiliadora
