PM vizita Bobonaru hodi haree besik kondisaun mínima ba implementasaun podér lokál
BOBONARU, 12 Marsu 2026 (TATOLI) – Primeiru-Ministru (PM), Xanana Gusmão, akompaña husi membru Governu sira, hala’o vizita, ohin, bá munisípiu Bobonaru hodi haree direta kondisaun mínima ba implementasaun podér lokál.
Xefe Ezekutivu to’o iha Jináziu Maliana pur volta tuku 09h20 no simu direta husi Prezidente Autoridade Munisípiu Bobonaru, Paulo Moniz Maia, ho serimónia tara tais antes halo diálogu ho populasaun Bobonaru.
Iha atividade ne’e, Xefe Governu mós tara tais ba intelektuál sira munisípiu Bobonaru nian ne’ebé partisipa iha sorumutu ne’e. “Apresu boot ba imi-nia partisipasaun, hanesan ida-ne’e mak loos duni. Labele hanoin de’it iha Dili, la fila mai ita-nia rai”, Xanana hateten iha nia intervensaun.
Biban ne’e, antigu Prezidente Repúblika ne’e husu ba intelektuál sira no konsellu veteranu munisipál atu hamutuk, unidu, hodi apoia Governu halo dezenvolvimentu Bobonaru.
“Labele halo buat ida partidarizmu, sukuizmu. Bolu joven sira halibur malu hodi defende povu nia direitu ba moris di’ak”, nia hato’o.
Aktividade ne’e hetan partisipasaun mós husi membru Parlamentu Nasionál, veteranu, autoridade sivíl, militár no komunidade.
Notísia relevante: PM Xanana husu Kovalima-oan atu hamutuk no evita intervensaun polítika iha governasaun lokál
Jornalista: Sergio da Cruz
Editora: Maria Auxiliadora
