KOVALIMA, 11 Marsu 2026 (TATOLI)- Primeiru-Ministru, Kay Rala Xanana Gusmão, husu ba Autoridade Munisipál Kovalima atu konsidera rezultadu avaliasaun kondisaun mínima husi Ministériu Administrasaun Estatál (MAE) hodi kontinua servisu hamutuk no Evita intervesaun polítika sira iha governasaun lokál.
“Ami mai fó hatene la’os atu hatun ita-boot sira, maibé atu bolu atensaun ba ita-boot sira atu kosentra ba servisu no Evita intervensaun polítika iha Governasaun lokál hodi foku ba servi povu. Labele hafuhu malu, imi servisu ba objetivu ida ba rai no ba povu, labele haree ba grupuizmu, Familiarizmu no partidarizmu hamutuk hodi hanoin rai ida-ne’e no povu nia moris”, PM Xanana hateten bainhira halo diálogu avaliasaun iha Munisípiu Kovalima, ohin.
Tanba bazeia ba avaliasaun kondisaun mínima iha rekomendasaun espesifiku mak kria ordén no disiplina rigór hodi evita abuzu podér no tane-as etika profisional hodi serbí povu.
“Ami mai iha ne’e atu rekomenda no fó hanoin ba ita boot sira katak atu sai governu lokál la’os de’it problema estrutura, maibé tenke tuir sistema no lei sira mak podér lokál ne’e la’o di’ak”, nia dehan
Xefe Governu, dehan iha aprezentasaun Kovalima-oan prontu atu simu podér lokál, maibé la’ós koalia de’it tenke ho asaun atu hadi’a-aan no hamutuk tanba Munisípiu Kovalima área potensiál kompara ho munisípiu sira seluk.
“Razaun hadia aan atu bainhira entrega ona podér lokál iha kbi’it rasik lori Suai ba dalan loos, maske Kovalima área ne’ebé potensiál bo’ot kompara ho Munisípiu sira seluk”, Xefe Governu fó hanoin ba Kovalima-oan.
Joven sira presiza kria pás
Biban ne’e, PM Xanana mós husu ba juventude Kovalima-oan atu kria pás hodi kontirbui ba estabilidade iha munisípiu Kovalima.
“Joven-sira evita hamosu violénsia hodi kria domin ho dame, labele husu de’it ba ba Estadu saida mak atu fó ba imi, tanba eroi sira nunka husu ba Estadu. Joven sira atu husu ba imi nia aan rasik, saida mak ita-boot atu halo ba Estadu hodi partisipa iha dezenvolvimentu,” Xefe Governu fó hanoin.
Ho nune’e, Eis Prezidente Repúblika ne’e mós husu atu joven sitra kontinua estuda atu iha kapasidade intelektuál atu kontribui ba dezenvolvimentu nasionál.
“Ita nia objetivu la’os atu hadia familia maibé presta servisu haree ba timor-oan sira nia kapasidade atu servi povu la’os haree ba grupu no família,“ katak PM
Iha sorin seluk, Xefe Suku Belekasak Leonito Gusmão, dehan lidér lokál prontu atu fó apoiu iha área saida deit hodi simu podér lokál
“Ami prontu atu fó apoiu ba autoridade Kovalima hodi simu Podér Lokál, nune’e bele reponde preokupasaun husi komunidade sira,” nia dehan.
Membru Governu ne’ebé mak akompaña, Primeiru-Ministru, Kay Rala Xanana Gusmão durante vizita traballu iha Kovalima ne’e mak hanesan, Ministru Planeamentu Investimentu Estratéjiku (MPIE), Ministru Administrasaun Estatál (MAE), Ministra Edukasaun (ME), Ministra Saùde (MS), Ministériu Agrikultura Peska Pekuária no Floresta (MAPPF), Vise Ministru Asuntu Infraestrutura, Sekretáriu Estadu Dezenvolmentu Lokál (SEDL), Sekretáriu Estadu Komunikasaun (SEKOMS). Expedito Loro Dias Ximenes.
Notisia relevante:PM Xanana husu intelektuál Ainaru-Oan servisu hamutuk simu podér lokál
Jornalista:Celestina Teles
Editór: Florencio Miranda Ximenes
