BOBONARU, 12 Marsu 2026 (TATOLI)-Autoridade Protesaun Sivíl (APC, sigla portugés) munisípiu Bobonaru no Diresaun Servisu Munisipál Protesaun Sivíl entrega pakote emerjénsia no halo identifikasaun ba uma tolu iha aldeia Aisalgusun, siku Ai-Asa, postu administrativu Bobonaru, ne’ebé hetan danus totál kauza husi rai-halai hafoin akontese udan-boot iha loron 10 Marsu ne’e.
Xefe Departamentu Dezastre APC munisípiu Bobonaru, Cristiano Leonardo Lengo, relata totál membru familia iha uma tolu ne’e hamutuk 11, kompostu husi feto lima no mane neen.
Uma tolu ne’e ida ho kategoria permanente no rua seluk semi-permanente.
Notísia relevante: APC Bobonaro alerta tempu anin hadok-aan husi ai hun-boot
“Tuir observasaun husi ekipa APC liuhusi xefe rekuperasaun katak uma referida tama iha kategoria aat totál no sei hetan apoia rekuperasaun iha tempu tuirmai hodi konstrui fali sira-nia uma”, Cristiano Lengo dehan ba Tatoli, ohin.
Membru uma-kain tolu ne’e daudaun hela ho família ne’ebé besik, tanba sira-nia uma aat totál.
Dezastre naturál ne’e danifika mós estrada ne’ebé konstrui husi Programa Nasionál Dezenvolvimentu Suku, inklui ai-riin eletrisidade.
Notisía relevante: APC Bobonaru rejista uma-kain 88 vítima ba dezaste naturál
Jornalista: Sergio da Cruz
Editora: Maria Auxiliadora
