DILI, 13 Marsu 2026 (TATOLI)—Sekretáriu Jerál ASEAN Korea Center, Kim Jae-Shing, hala’o enkontru ho Primeiru-Ministru, Kay Rala Xanana Gusmão, hodi hadi’a no hamerin relasaun bilaterál entre Timor-Leste ho Korea iha área komérsiu no investimentu, kultura no turizmu.
“Ami to’o Dili horisehik, ami haree futuru Timor-Leste ne’ebé promete tebes no bainhira ami fila fali ba Korea, ami sei hanoin kle’an oinsá hametin relasaun ho Timor-Leste,” Sekretáriu-Jerál ASEAN Korea Center ne’e informa ba jornalista sira iha Palásiu Governu, ohin.
Objetivu halo reuniaun badak ho Primeiru-Ministru hodi troka hanoin kona-ba oinsá hadi’a relasaun entre Korea no Timor-Leste no kongratula ba adezaun Timor-Leste nian iha ASEAN no buka dalan ba kooperasaun entre Korea ho Timor-Leste.
Sira sei implementa programa barak no sei kontinua hametin liután husi embaixadór Timor-Leste iha Korea no mós sira-nia embaixada iha Dili, aleinde nia fiar katak sei hasoru malu fali iha futuru mai.
“Primeiru-Ministru subliña importánsia kooperasaun iha komérsiu, investimentu no área seluk. Ha’u hanoin Timor-Leste sei iha futuru naroman, tan ne’e emprezáriu Korea barak liu sei vizita hodi buka posibilidade kooperasaun entre nasaun rua,” nia hateten.
Jornalista : Alexandra da Costa
Editór : Cancio Ximenes
