DILI, 13 Marsu 2026 (TATOLI)—Ministériu Interiór (MI) no Komandu Polísia Nasionál Timor-Leste (PNTL), Sesta ne’e, hahú diskute promosaun trazitóriu ba membru Polísia sira ne’ebé iha nível postu ofisiál superiór.
Diskusaun ne’e prezide husi Ministru Interiór, Francisco da Costa Guterres, akompaña husi Segundu Komandante Jerál PNTL, Komisáriu Pedro Belo no partisipa husi Komandante Operasaun Nasionál PNTL Superintendente Xefe Afonso dos Santos, Komandante Komandu Munisípiu, Komandante Unidade, Diretór Diresaun sira inklui Xefe Departamentu sira.
“Primeiru ami ko’alia kona-ba kestaun seguransa rai-laran, segundu maka
promosaun. Tanba ne’e, ohin iha diskusaun la’o hela sira mós fó sira-nia opiniaun balun para ida-ne’e konsulta ba sira atu rona loloos opiniaun oinsá depois sira fó hatene ami ba formula didi’ak, formula hotu ona maka semana oin anúsiu ba públiku kona-ba promosaun ba sira,” Ministru Interiór hato’o ba Jornalista hafoin reuniaun ho Ofisiál Superiór PNTL, ne’ebé hala’o iha Sentru Formasaun Polísia, Komoro.
Notísia relevante : Ministru Interiór prefere halo uluk promosaun diviza ba Ofisiál Superiór PNTL
Nia dehan, bainhira ofisiál PNTL sira hato’o opiniaun kona-ba promosaun ne’e tenke haree mós antiguidade serbisu, veteranu, pozisaun, deviza atuál inklui haree mós ba ofisiál sira ne’ebé komete infrasaun displinar, ho nune’e Ministériu Interiór iha prazu atu rezolve problema sira.
Governu realiza faze ikus husi promosaun trazitóriu iha tinan kotuk.
“Promosaun ba ofisiál ne’e sei halo iha semana oin molok halo aniversáriu PNTL iha loron 27 Marsu agora. Sira ne’ebé mak atu halo promosaun ne’e iha ema na’in-63,” nia akresenta.
Promosaun deviza ba ofisiál sira sei hala’o iha Komandu Jerál PNTL. Ba ofisiál superiór ne’ebé mak atu hetan promosaun deviza tenke priense kritériu ofisiál ne’e tenke serbisu ba PNTL duramte tinan 16.
“Sira ne’e priense hotu kedan 16 anos traballu iha institusaun PNTL,” Ministru katak.
Promosaun ba deviza ne’e hatudu deviza Superintendente Asistente antiguidade ba Superintende no Superintendente sei promove ba Superintendente Xefe no Superintendente Xefe ba Komisáriu Asistente.
Jornalista : Natalino Costa
Editora : Julia Chatarina
