VIKEKE, 15 Marsu 2026 (TATOLI) – Progresu kontrusaun estrada Lugatoi, suku Karaubalu, Postu Vikeke Vila daudauk ne’e atinji ona 82,82%, besik konklui obra, Koodernadór Infraestutura Ministériu Obras Públika (MOP) Munisípiu Vikeke, Mario Angelo Menezes, informa.
“Husi progresu servisu ne’ebé empreza hala’o mak teramis rai, ateru envakmen no kompleta kamada estrada, depois ida-ne’e hotu empreza sei konstrui sabeis nian,” Mario Angelo Menezes ba TATOLI, iha Postu Vikeke Vila, ohin.
Nia dehan, bazeia ba kontratu empreza mós sei konstrui kanalizasaun parte foho-hun nian inklui morru protesaun hafoin loke estrada hodi populasaun sira bele asesu.
“Iha kontratu empreza sei konstrui saluran (Kanalizasaun), morru protesaun, depois ida-ne’e hotu hafoin ita loke dalan hodi movimentu asesu estrada iha área Lugatoi nian. Entantu, daudauk ne’e movimentu transporte sira sei kontinua utiliza estrada tuan ne’ebé iha parte leten”, nia akresenta.
Alende ne’e, Koordenadór MOP Vikeke ne’e dehan, dezafiu ne’ebé empreza Hoven II Unipessoal Lda enfrenta mak embakmen tanba embakmen hahú konstrui husi mota mak sa’e entaun aas tebes.
“Iha prosesu aterru ne’e lori tempu. Kuandu udan, empreza tenke hein udan para hafoin sira kontinua serbisu aterru, depois halo teste mak kontinua aterru. Ida-ne’e mak sai difikuldade ba empreza. Maibé, serbisu fíziku iha terrenu la’o kapas tebes, dezeñu tuan estrada ninia metru 14 maibé distánsia 300 metru resin. Hakarak klarifika katak estrada referida sei la afeta abatamentu ne’ebé iha área Lugatoi nian”, nia realsa.
Entretantu, Projetu ne’e MOP ba konstrusaun Estrada Lugatoi, númeru kontratu SSS/043?MOP-2025, hahú konstrusaun 13 fulan-Maiu tinan-2025 sei konklui iha loron 13 fulan-Maiu 2026. Obra Lugatoi gasta orsamentu 1,236,708.46, responsavel husi empreza Hoven II Unip Lda.
Iha fatin ketak, Xefe suku Karaubalu, João Pinto, haktuir kona-ba konstrusaun estrada Lugatoi metru 300-resin ne’ebé empreza hala’o hela ne’e besik konklui ona sira-nia serbisu bainhira estrada ne’e hotu sei ajuda tebes movimentu transporte sira.
“Durante ne’e ita haree estrada parte husi Lugatoi sai difikulta tebes ba ita-nia movimentu sira. Kauza husi errosaun (rai-halai) hodi afeta ba estrada Lugatoi, entaun transporte sira liuliu karreta sira tenke liuhusi fali mota. Depois MOP normaliza hafoin karreta ki’ik no motorizada sira liu iha área Lugatoi, maibé karreta boot hanesan fuzu daudauk ne’e sei kontinua liuhusi mota. Nune’e, estrada Lugatoi hotu sei fasilita tebes movimentu transposte sira,” nia hato’o.
Notísia relevante:Progresu konstrusaun estrada Uatulari liga ba Laisorulai atinji 20% resin
Jornalista : Vitorino Lopes da Costa
Editór : Rafael Ximenes de A. Belo
