DILI, 15 Marsu 2026 (TATOLI) –Tane Konsumidór rekomenda ba importadór inklui Sentru no Retallista Kombustível sira atu labele hasa’e presu kombustível ne’ebé mai husi estoke tuan derrepente. No, bainhira ida-ne’e akontese Tane Konsumidór konsidera katak ne’e ladun iha étika tanba fó prejuízu ba konsumidór sira.
“Stock ne’ebé tuan ne’e sosa ho presu ne’ebé diferente, entaun loloos ne’e folin sei normál lai, tanba ita rona husi mídia empreza importadór sira katak stock kombustivél sufisiente to’o fulan haat, maibé derrepente de’it hasa’e folin ida-ne’e la loos. Entaun loloos folin sei normál no bainhira mina ne’e hotu sosa foun mak hasa’e folin,” Robin Araújo hateten ba jornalista TATOLI iha nia kna’ar fatin Vila-Verde, domingu ne’e.
Notísia relevante:Retalista sira hasa’e folin kombustivel tuir presu husi empreza fonesedora
Tane Konsumidór rekoñese katak mina folin sa’e tanba funu ne’ebé agora daudaun akontese iha Médiu Oriente maibé labele hasa’e folin husi estoke anteriór. Ida-ne’e akontese, Tane konsidera manipulasaun presu aproveita situasaun funu.
Ho nune’e, Prezidente Asosiasaun Tane Konsumidór, Robin Araújo, husu ba Governu tenke kotrola tanba bainhira hasa’e folin mina, automatikamente, sei afeta mós ba folin sasán liuliu nesesidade bázika.
“Ami hatama ona karta ba ETO atu konsidera filafali sira-nia presu ne’ebé tau ho stock ne’ebé tuan ne’e. Karik atu hasa’e folin bainhira stock ne’e hotu sosa foun, ETO rasik seidauk iha resposta,” nia informa.
Autoridade másima Tane Konsumidór ne’e akresenta katak, iha tempu-badak mós TANE sei halo monitorizasaun ba presu folin sasán iha merkadu kompara ho antes ne’e tanba folin mina hahú sa’e.
“TANE sei sei halo monitorizasaun ba presu folin sasán iha merkadu kompara ho antes ne’e tanba folin mina hahú sa’e,” nia kompromete.
Notísia relevante:Tane Konsumidór husu públiku bainhira hetan irregularidade hato’o keixa
Jornalista: Natalino Costa
Editór: Rafael Ximenes de A. Belo
