DILI, 16 Marsu 2026 (TATOLI)—Sekretária Ekipa Médika Autónoma ba Asuntu Veteranu iha Klínika Veteranu iha Hospital Nasionál Valadares (HNGV), Bendita de Araujo, informa iha 2025 ne’e Klínika Veteranu iha HNGV halo tratamentu ba veteranu hamutuk 1.487 no husi númeru ne’e transfere veteranu na’in-69 halo tratamentu saúde iha ospitál Singapura no Malázia.
Pasiente hirak ne’e, nia dehan, maiória husi pasiente sira-ne’e halo tramanetu iha Malázia no Singapura ne’e mesak sofre moras onkolojia, kardiolojia no urulojia.
“Husi pasiente na’in-69 mak halo transferénsia ba rai-liu’r ne’e na’in-60 rekupera ona no fila iha 2025 ne’e. Iha Sesta (13 Marsu) semana kotuk, na’in-rua (2) fila tan no agora sei falta de’it na’in-hitu (7) mak hela iha ne’ebá,” Bendita de Araujo hateten ba Jornalista sira iha nia kna’ar fatin, HNGV, Bidau, ohin.
Timor-Leste iha akordu ho nasaun Singapura ho Malázia de’it, maibé Singapura ne’e moras ida ne’ebé mak labele halo tratamentu iha Malázia entaun bele transefere ba Singapura hodi halo tratamentu saúde intensive.
Nia dehan, iha tinan 2026 ne’e, Klínika Veteranu iha HNGV prepara dokumentu kuaze 20-resin atu kontinua tan halo tratamentu iha rai-li’ur.
“Loos, iha tinan 2026 ne’e, sei haruka tan. Iha dokumentu barak kuaze 20-resin mak atu ba, maibé daudaun ne’e sei iha prosesu hela, sira-ne’e kuaze moras hanesan de’it no barak liu mak Onkolojia ka kankru nian. Segundu ne’e mak moras Kardiolojia no terseiru mak urolojia nian,” nia esplika.
Kauza husi moras sira-ne’ebé mak ohin temi primeiru mak haree ba sira-nia idade ne’ebé mak ho avansadu ona.
“Depois ita-nia fatór estilu de vida, maibé pasiente veteranu ne’e barak liu mak mai ho tensaun maka’as. Tanba dieta hahán sira-ne’e, depois sira-ne’ebé mak gosta hemu alkol no mós fuma sigaru, depois ladún halo ezersisiu depois mós ita la haan hahan sira-ne’ebé tuir oráriu entaun ida-ne’e mak nia kauza,” nia dehan.
Entretantu, daudaun ne’e profisionál saúde hamutuk na’in-ualu (8) mak servisu iha klínika Veteranu iha Hospitál Nasionál Guido Valadares.
Antes ne’e, Diretóra Nasionál Servisu Hospitalar iha Ministériu Saúde, Maria Santina de Jesus Gomes, hateten iha tinan 2025 ne’e Ministru Saúde liuhusi Diresaun Nasionál Servisu Hospitalár iha Ministériu Saúde halo ona traferénsia ba pasiente hamutuk na’in-122 no pedidu husu junta médiku hamutuk na’in-191.
“Transferénsia pasiente ba rai li’ur iha tinan 2025 hamutuk 122 pesoa, pedidu junta médika mai 191 pesoa, sira-ne’ebé mak halo tratamentu hotu ona 87 pesoa, sira ida kontinua ne’e 30 pesoa,” nia dehan.
Jornalista : Feliicdade Ximenes
Editór : Cancio Ximenes
