DILI, 16 Marsu 2025 (TATOLI)—Kontestante reperezentante Timor-Leste, Eufrasia Vieira eleitu sai “Miss Social Media” no “Miss Planet International Ambassador” iha serimonia Grand Final Miss Planet International 2026 ne’ebé realiza iha Koh Pich Theater Kamboja, iha 15 Marsu 2026.
Notísia Relevante: Eufrasia sei reprezenta TL partisipa “Miss Planet International 2026” iha Kamboja
Eufrasia Vieira manán iha kategoria Miss Social Media no Miss International Ambassador ne’e, hafoin nia akupa fatin iha Top 20 iha faze eliminasaun no hetan Top 10 iha grand final eventu Miss Planet International 2026 husi konetstante nasaun seluk hamutuk 31.
Manán-na’in sira Miss Planet International bazeia ba kategoria sira mak Timor-Leste manán kategoria Miss Social Media, Mexico manán kategoria Miss Top Model, Kamboja manán kategoria Miss Beat Interview no kategora Best in National Costum ne’e manán husi US Virgin Island.
Eventu Miss Planet International ne’e halo promosaun ba Objetivu Dezenvolvimentu Sustentavel Nasaun Unida nian no atu fó inspirasaun inklui hakbiit partisipante sira sai modelu ka matadalan iha sira-nia komunidade no iha mundu.
Eventu internasionál ne’e ho objetivu atu halo mudansa sosiál ne’ebé atu hametin domin ba ema seluk no respeita ambiente.
Iha Eufrasia Vieira nia aprtezentasaun iha grand final Miss Planet International 2026 ne’e, nia orgullu hodi reprezenta Buibere Timor-Leste tomak haklaken kona-ba Timor-Leste nia tasi be furak.
“Kalan ne’e ha’u hamriik iha ne’e hanesan Buibere husi Timor-Leste. Ha’u moris iha Dili, hanesan Kapital Timor-Leste. Ha’u moris no boot iha Dili, hela besik tasi ibun no loro-loron ha’u haree peskadór kaer ikan iha tasi ibun. Tasi nu’udar pate ida iha ha’u-nia moris,” nia dehan.
Timor-Leste iha poténsia ba tasi ida furak, rekursu tasi ne’ebé mak nakonu ho kór oioin iha tasi laran, iha baleia no mos Tubaraun no seluk tan. Husi nee, iha Tasi Timor iha mós Ilha Atauru iha biodiversidade furak tebes iha mundu.
“Oras ne’e ami-nia tasi hasoru problema sériu ida kona-ba poluisaun, afeta husi poluisaun plástiku ne’ebé hamosu polusaun tasi hodi estraga abitante sira iha atsi laran. Tanba ne’e, importante tebes atu próteje Oseanu. Ba ha’u-nia nasaun Timor-Leste tasi la’ós de’it fatin pasear maibé Tasi hanesan nu’udar ami-nia fatin ba hahan kultura, ekonomia no ba ami-nia moris ba futuru. Idea ba Ekonomia Azul, edukasaun ne’e importante ba ha’u no ba ema katak salva guarda oseanu ne’e salva guarda ami-nia futuru. Ha’u fiar katak sustentablidade akontese bainhira Salva Guarda ba Ambentál no rekursu umanu presiza moris no dezenvolve hamutuk,” nia hateten.
Antes ne’e, komisaun organizadora hili Eufrasia Vieira sai kontestante reprezenta Timor-Leste iha eventu ne’e, komisaun organizasaun hili nia liuhusi check ninia background ho kle’an no loloos, liuhusi ninia atividade no fotografia sira iha ninia pájina rede sosiál.
“Foufoun ha’u rona, ha’u ladun fiar tanba ho ha’u-nia idade ida-ne’e no ha’u-nia estatutu hanesan kaben-na’in ona, imposivel ba ha’u sai kandidata iha eventu boot ida-ne’e. Entaun sira fó valór liu ba ita-nia esperiénsia moris no impaktu husi ida-idak nia an atu kontribui ba ambiente no sosiedade atu sai saudavel liu. Entaun, ba ida-ne’e ha’u prontu,” Eufrasia hateten.
Eufrasia dezloka ba Kamboja iha 06 Marsu 2026 iha obriagsaun tama karantina hamutuk ho kontestante sira seluk antes serimónia ne’e hahú to’o tama iha serimónia grand final Miss Planet International 2006.
Maske Eufrasia Vieira reprezenta Timor-Leste iha eventu Miss Planet International 2026 ba ho nin ia ekipa husi Indonézia no fanansia rasik ninia viajen hodi fasilita nia durante partisipa iha eventu internasionál iha Kamboja.
TATOLI
