DILI, 16 Marsu 2026 (TATOLI)–Governu liuhusi Ministru Justisa, Sérgio Hornai, Segunda ne’e, halo abertura ba kursu formasaun VIII ba Majistradu Judisiál, Majistradu Ministériu Públiku no Defensoria Públika.
Kursu ne’e partisipa husi ema na’in-36 ne’ebé fahe ba turma tolu, kompostu husi kandidatu Juíz na’in-14, Prokuradór na’in-12 no kandidatu Defensór Públiku na’in-10
Diretór Sentru Formasaun Jurídiku Judisiária, Francisco Xavier Vasco Soares, hateten, kandidatu sira ne’ebé engresu ba vaga kursu formasaun ne’e hamutuk ema na’in-384 no ikus mai pasa ba prova eskrita hamutuk 51 no pasa ba prova psikolojia no orál hamutuk 36.
“Kursu Formasaun ne’e nia natureza ezije reflesaun artikulasaun kapasidade pedalójika institusionál no kongresu ida-ne’ebé forte nu’udar misaun sólida ida atu forma formadu sira bele asegura funsionamentu sistema justisa iha Timor-Leste,” Diretór Sentru Formasaun hato’o durante abertura atividade iha Sentru Formasaun Kaikoli.
Biban ne’e, Jestór Sentru Formasaun husu ba formandu sira atu aproveita tempu ho di’ak hodi sai Juíz, Prokuradór no Defensór hodi serví Estadu no povu ho di’ak.
“Hau hakarak hato’o katak formandu sira ohin hahú ba abertura ba oitavu kursu ida-ne’e ezijente no responsabilidade atu prepara ita-boot sira hodi halo funsaun ida-ne’ebé esensiál no funsionamentu Estadu direitu iha Timor,” nia katak.
Sentru ne’e hanesan instituisaun ida-ne’ebé responsável ba formasaun inisiál no formasaun kontinua ba Majistradu Judisiál ba Majistradu Ministériu Públiku, Defensór Públiku nomós ba Ofisiál Justisa inklui Notariadu sira, no koservadór sira iha Ministériu Justisa.
Notísia relevante : KSMJ aprova no hili 03 Dezembru nu’udar tinan judisiáriu ba Tribunál
Nune’e, Diretór sentru enkoraja ba formadu na’in-36 atu foku ba estuda, nune’e ba futuru bele sai profisionál.
“Ha’u atu enkoraja formadu sira tanba formasaun ida-ne’e todan tebes, enkoraja ita-boot sira estuda ho didi’ak para hetan susesu iha ita-boot sira-nia kadeira hanesan Juíz, Prokuradór ka hanesan loos saida mak ita-boot sira-nia família no Estadu hakarak,” nia fó hanoin.
Iha fatin hanesan, Ministru Justisa, Sergio Hornai husu ba formadu sira atu aproveita tempu ho di’ak hodi Estuda atu kontinua legadu iha setór justisa ba povu no nasaun.
“Ha’u hanesan imi-nia señór, no iha ne’e iha mós Prezidente Tribunál Rekursu ne’ebé desde uluk halo serbisu iha área Justisa, hahú iha 1999 hodi hahú konsolida Estadu ida-ne’e, ha’u hakarak imi kontinua legadu ida-ne’e. Estuda hodi imi bele hadi’a estadu ida-ne’e ho di’ak liután no imi-nia família,” nia hato’o.
Kursu formasaun ida-ne’e nu’udar meiu ida ba Governu halo atu apoia rekursu sira iha setór justisa ba estabelesimentu instalasaun Supremu Tribunál Justisa.
Ministru konsidera katak formasaun hanesan ne’e importante atu reforsa rekursu sira iha Majistradu Judisiál ba Tribunál sira, Majistradu Ministeriu Públiku nia ajente no Defensór Públiku nia ajente hodi presta serbisu di’ak ba povu iha futuru.
Jornalista : Natalino Costa
Editora : Julia Chatarina
