Hospital Lahane kontinua fó tratamentu ba pasiente paliativu sira
DILI, 16 Marsu 2026 (TATOLI)—Diretór Servisu Apoiu Diagnóstiku no Terapeutiku iha Hospital Nasionál Guido Valadares (HNGV), Vidal de Jesus, hateten Unidade Kuidadu Paliativu iha Hospital Nasionál Guido Valadares ne’ebé muda ona ba Hospitál António Carvalho Lahane fó nafatin tratamentu ba pasiente sira.
“Unidade kuidadu paliativu ne’e mak lokaliza iha ospitál António Carvalho Lahane hamutuk kama 10, maibé daudaun ne’e pasiente na’in-ualu (8) mak okupa iha ne’ebá. Pasiente sira-ne’e ho ida-ne’e ne’e mak adultu mak barak no kazu sira-ne’ebé mak barak liu ne’e kazu Onkolojia nian,” Diretór Servisu Apoiu Diagnóstiku no Terapeutiku ne’e hateten ba jornalista sira iha nia kna’ar fatin HNGV, ohin.
Nia relata, pasiente sira-ne’ebé mak sofre kankru ne’ebé mak iha ona estadiu terminál ona no kontínuasaun halo kuidadu paliativu iha Hospitál António Carvalho Lahane.
“Pasiente sira-ne’e kuaze loro-loron ne’e iha hela de’it, maibé pasiente sira-ne’e mós lahó kankru de’it maibé pasiente sira-ne’ebé mak moras depende de’it ona ba oksijéniu, tanba pulmaun ne’e la auguenta entaun sira mós ba halo tratamentu iha ne’ebá hotu,” nia dehan.
Nia dehan, kuidadu paliativu ne’e hanesan tratamentu ida-ne’e mak halo de’it ona konservatóriu no halo jestaun ba ema ne’e moras mak karik atu asegura de’it nia moras ne’e la bele maka’as.
“Kuidadu Paliativu ne’e iha ne’ebá iha mós iha balun halo de’it tratamentu iha uma ne’e la’ós responsável ba ospitál nian, ospitál nia mak responsável ba kria unidade ida atu hodi baixa pasiente sira-ne’ebé mak tama ona kritériu kuidadu paliativu nian. Aleinde ne’e mós hanesan kazu sira-ne’ebé mak maluk pasiente sira-ne’ebé mak halo tratamentu iha rai-li’ur-transferénsia fila mai detekta tama ona faze terminál ba moras ne’e rasik. Entaun, ita iha ona sistema no ita iha unidade hodi kontinua tratamentu paliativu iha ne’e,” nia dehan.
Kona-ba profisionál saúde sira-ne’ebé mak halo atendimentu iha ospitál António Carvalho Lahane daudaun ne’e sufisiente hela.
Antes ne’e, Ministériu Saúde autoriza Hospitál Nasionál Guido Valadares atu muda unidade kuidadu paliativu ba Hospitál António Carvalho Lahane, atu nune’e bele minimiza Overload iha HNGV.
“Ha’u fó ona autorizasaun ba Hospitál Nasionál Guido Valadares atu muda, maibé presiza kompleta tan ekipamentu balun. Ha’u aprovadu ona maibé depois mak ita haree. Ita hateten katak ospitál ne’e presiza tan kompleta tan sasán sira. Ha’u hanoin sei iha mudansa, maibé ekipa preparadu ona,” Ministra Saúde Élia dos Reis Amaral dehan.
Nia dehan, Ministériu Saúde fó duni espasu ba Hospitál Nasionál Guido Valadares atu muda kuidadu paliativu ba iha Lahane, nune’e bele fó espasu ba HNGV atu halo atendementu ba moras seluk.
Jornalista : Felicidade Ximenes
Editór : Cancio Ximenes
