LAUTEIN, 16 Marsu 2026 (TATOLI) – Primeiru-Ministru, Xanana Gusmão, inaugura Balkaun Úniku (BU) no edifísiu Diresaun Munisipál Transporte no Komunikasaun (DMTK), iha postu administrativu Lospalos Vila, munisípiu Lautein.
Inaugurasaun ne’e halo iha ámbitu vizita bá munisípiu Lautein hodi partisipa atividade “Haree besik servisu munisipál husi rezultadu Avaliasaun Kondisaun Mínima” ne’ebé realiza iha Lospalos Vila.
Iha serimónia ne’e, Xefe Ezekutivu akompaña husi Ministru Administrasaun Estatál (MAE), Tomás Cabral, ne’ebé iha okaziaun ne’e mós entrega kartaun Billete Identidade (BI) naun limitadu bá Ema ho Difisiénsia (EhD), Francisco de Jesus Ximenes, inklui atribui Sertidaun Rejistu Kriminál ba benefisiária Marcelina Dias. Edifísiu Balkaun Úniku ne’e konstrui ho orsamentu Estadu hamutuk rihun $145.
Ministru Tomás Cabral informa katak Balkaun Úniku iha munisípiu Ermera mós prontu ona no iha tempu badak sei halo inaugurasaun, falta de’it mak Ainaru no Vikeke mak seidauk iha.
“Preokupasaun ita hotu nian maka pasaporte, maibé iha BU munisípiu halo de’it rejistu no impresaun sentraliza iha Ministériu Justisa. Problema seluk neʼebé Balkaun Úniku sira enfrenta maka notaridadu tanba notariadu sira iha munisípiu susar atu kontrola. Ha’u husu ba Prezidente Autoridade Munisípiu Lautein tenke tau-matan ba ida-ne’e”, nia dehan.
Governante ne’e husu ba diretór notariadu no autoridade sira atu kontrola ekipamentu sira hodi atende populasaun, tanba Balkaun Úniku seidauk estabelese iha Lautein tenke bá halo tratamentu dokumentu iha Baukau, Manatutu no Dili, maibé agora iha ona tenke jere ho didi’ak.
Prezidente Autoridade Munisípiu Lautein, Mélio de Jesus, agradese bá Governu tanba orsamentu ba programa ne’e pasa iha Komité Revizaun Orsamentu (KRO) 2024, ne’ebé konsege konstrui edifísiu hodi fó atendimentu ba populasaun.
Iha Balkaun Úniku ne’e sei fasilita populasaun hodi trata dokumentu ofisiál sira hanesan, Pasaporte, Billete Identidade, Sertidaun Rejistu Kriminál no dokumentu seluk tan.
Iha oportunidade ne’e, Primeiru-Ministru mós entrega mós motorizada ida no karreta ida hodi fasilita funsionáriu sira hala’o atendimentu di’ak bá populasaun.
Inaugurasaun edifísiu DMTK
Liga ba inaugurasaun edifísiu DMTK, Xefe Governu hetan akompañamentu husi Ministru Transporte no Komunikasaun, Miguel Marques Manetelu.
Miguel Manetelu esplika katak antes ne’e iha edifísiu ki’ik ida hodi fasilita funsionáriu sira hala’o serbisu, liuliu halibur reseita sira husi serbisu diresaun ne’e rasik.
“Husu ba dirijente no funsionáriu sira neʼebé serbisu iha fatin ne’e atu kuidadu didi’ak hodi bele fó atendimentu ba ita-nia populasaun ho dignu”, governante ne’e husu.
Nune’e mós Prezidente Autoridade Munisípiu Lautein, Mélio de Jesus, lori povu Lautein nia naran agradese Governu ne’ebé fó apoiu liuhsi orsamentu Programa Dezenvolvimentu Integradu Munisipál hodi konstrui edifísiu referidu.
Mélio de Jesus konsidera edifísiu ne’e importante atu fasilita funsionáriu sira serbisu ho di’ak, liuliu fó atendimentu ba povu.
“Uluk tinan rua liubá edifísiu ba Diresaun Servisu Munisipál Komunikasaun la’o ladún di’ak nune’e ita konstrui ida-ne’e, no hafoin konstrui, iha tinan 2025, ami rekolla reseita ba kofre Estadu hamutuk rihun $123. Ida-ne’e fasilita tebes ita-nia konsumidór sira ne’ebé utiliza motorizada mai rejistu iha edifísiu ida-ne’e”, adianta.
Osamentu ba konstrusaun edifísiu ne’e ho montante rihun $222. Partisipa iha serimónia inaugurasaun ne’e mak membru Governu, membru Parlamentu Nasionál, Tenente-Jenerál, Lere Anan Timur, Majór-Jenerál João Miranda ‘Aluc Descartes’, Majór-Jenerál Cornélio Ximenes ‘Maunana; no intelektuál Lautein-oan sira.
Notísia relevante: Lautein-oan tenke unidu hodi simu podér lokál – Xanana
Jornalista: Arminda Fonseca
Editora: Maria Auxiliadora
