DILI, 17 Marsu 2026 (TATOLI)—Governu liuhusi Ministériu Defeza (MD) foin lalais ne’e inaugura konstrusaun Akademia Militár Konjuta, ne’ebé daudaun ne’e empreza halo hela instalasaun balun hodi bele hahú ona aula dahuluk.
“Aula primeiru kursu ida-ne’e daudaun atu halo rekrutamentu ba estudante sira no prosesu selesaun ba kadete sira prontu hotu ona, Fulan-Juñu primera aula Akademia Militár nia komesa,” Ministru Defeza Kontra Almirante Donaciano do Rosário da Costa Gomes, informa ba Jornalista sira iha ninia knaar fatin, Fatuhada, Tersa ne’e.
Notísia relevante : Governu inaugura edifísiu Akademia Militár iha Aileu
Aula dahuluk ba estudante na’in-70 sei tama iha rejime internatu, ne’ebé prevee fatin ba sira hela, han no estuda hotu iha koléjiu.
Ministru dehan, MD sei dezeña programa ida ba Akademia Militár Konjuta, ne’ebé joven hotu iha oportunidade estuda siénsia militár, seguransa no defeza, maibé la presiza atu sai militár.
“Sira mós bele iha oportunidade para tuir kursu abertu ida ami bolu IBRIDU iha Akademia Militár no sira kuadu gradua ho lisensatura iha área seguransa no defeza nasionál, hanesan lisensiadu iha área ne’e no sira iha ekivalénsia akadémika,” nia katak.
Kandidatu sira ne’ebé atu konkorre iha programa IBRIDU ne’e ba sira ne’ebé ramata ona Ensinu Sekundáriu.
Jornalista : Natalino Costa
Editora : Julia Chatarina
