KOVALIMA, 17 Marsu 2026 (TATOLI)- Aplikante na’in-100-resin husi postu administrativu hitu munisípiu Kovalima, submete ona sira-nia dokumentu hodi kompete iha prosesu rekrutamentu husi Institutu Nasionál Estatístika Timor-Leste (INETL-I.P).
INETL.I,P loke vaga ne’e servisu hamutuk ho Ministériu Solidariedade Sosiál no Inkluzaun ne’ebé hetan apoiu husi ONG Internasionál WFP.
“Ami hahú loke vaga ba bolsa da mae Kondisionál no salva Saúde inan no oan iha loron 4 Marsu ne’ebé sei taka iha 24 Marsu 2026 no daudaun ne’e aplikante 100-resin mak submete ona sira-nia dokumentu” , Xefe Departamentu Servisu Estátistika Munisípiu Kovalima, Fernando Perreira relata ba Tatoli, iha Tabakolot.
Objetivu loke vaga ne’e rekolla dadus bolsa da Mãe Kondisionál no Saúde nutrisaun Inan no oan ho totál vaga ne’ebé mak fó sai iha kuadru avizu hamutuk 128 husi númeru área ba supervizór, enumeradór no motorista
Kritéria atu aplika vaga ne’e mak hanesan karta rekerementu, Kurrikulum Vitae, foto kopia diploma legalizadu, foto kopia sertifikadu Kursu,foto kopia kartaun eleitorál, BI, Sertidaun RDTL kloridu no foto kopia númeru konta bankária.
Tuir oráriu iha loron 25 to’o 27 Marsu ne’e hahú halo selesaun dokumentu no nia Rezultadu sei anúnsiu iha 30 marsu no entrevista hahu 6 to’o 10 abril no rezultadu final anúnsiu iha 15 Abríl
Aplikante ne’ebé mak pasa iha vaga referidu sei presta servidu suranteb fulan ida nune’e sira sei presta servisu iha ida-idak nia postu no suku ne’ebé mak tuir aplikante sira supmete dokumentu.
Entretantu, Aplikante Angelina do Carmo, dehan Instutitutu Nasionál Estatístika (INETL-I.P) loke vaga hanesan timor-oan hakarak konkorre, nune’e bele kompete iha prosesu rekrutamentu
“Ha’u mai atu submete ha’u nia dokumentu relasiona INETL-I.P loke vaga no hanesan sidadaun Timor-oan hakarak tuir prosesu rekrutamentu iha INETL-I.P pasa la pasa ba ha’u la problema”, nia dehan.
Jornalista:Celestina Teles
Editór: Florencio Miranda Ximenes
