“Ha’u lori sentavu 200 atu sosa sasán, loja-na’in dehan osan falsu”
DILI, 17 Marsu 2026 (TATOLI)—Komunidade iha suku Maskarinhas, Saturnina dos Santos, sente preokupadu ho sirkulasaun moeda sentavu 200 iha Timor-Leste ne’ebé fó impaktu ba sira atu sosa sasán iha loja sira tanba loja-na’in balun lakohi simu osan refere.
Notísia Relevante: BCTL apela ba públiku no loja sira atu kontinua utiliza moeda sentavu 200
“Ha’u lori osan sentavu 200 atu sosa sasán iha loja, maibé loja-na’in lakohi simu tanba dehan osan falsu. Entaun, ha’u tenke ba sosa fali iha loja seluk ne’ebé mak simu osan ida-ne’e, tanba ha’u ferik ona ne’ebé lahatene halo komparasaun ba osan,” nia informa ba Agência Tatoli, iha Merkadu Lama, Kaikoli, ohin.
Nia dehan, osan sentavus 200 ne’e loja balun lasimu no balun simu, tanba de’it osan falsu mós hahú sirkula ona iha merkadu, entaun Governu tenke esforsu deteta lalais kazu ida-ne’e se lae fó impaktu ba komunidade.
“Informasaun husi BCTL dehan osan sentavu 200 ne’e legál bele halo transasaun iha merkadu, maibé loja balun lakohi simu. Entaun Governu no autoridade kompetente tenke iha sensibilizasaun ba loja sira atu simu nafatin osan ida-ne’e,” nia dehan.
Jestora Restaurante Linivon, Evonia da Silva Chong, hateten sira-nia restaurante nafatin simu osan sentavu 200 hodi halo transasaun iha negósiu, tanba bainhira sira la simu sei fó impaktu ba sira-nia rendimentu no lukru.
“Ami tenke simu, ida-ne’e mak konsekuénsia husi negósiu, ne’ebé hakarak ka lakohi tenke simu. Se ita lasimu entaun ema la mai sosa sasán iha ita-nia fatin. Tanba ne’e, mak ami simu nafatin hodi sosa fali sasán iha loja seluk ne’ebé simu osan ne’e,” nia dehan.
Nia afirma, loos duni iha loja balun mak lasimu osan sentavu 200, maibé ida-ne’e lasai kestaun tanba iha fatin balun mak sei nafatin simu osan ne’e rasik, no alternativa seluk mak bainhira loja sira lakohi simu osan sentavu 200 mak lori ba troka iha BCTL.
“Tanba ne’e, husu ba BCTL no parte seguransa sira atu buka lalais ema ida-ne’ebé prodús osan falsu hodi halo sirkula iha Timor, tenke iha kontrolu másimu se lae fó impaktu ba atividade ekonómia,” nia dehan.
Entretantu, tuir observasaun Agência Tatoli iha terrenu bainhira halo survei ba loja sira, hatudu katak loja-na’in sira kontinua simu osan sentavu 200 ba transasaun negósiu nian, tanba sira hetan ona informasaun husi BCTL katak osan refere legál hela no la legál sira iha alternativa atu ba troka iha BCTL.
Notísia Relevante: Sidadaun sira troka moeda sentavu 200 iha BCTL
Jolrnalista : Alexandra da Costa
Editór : Cancio Ximenes
