DILI, 17 Marsu 2026 (TATOLI)—Ministériu Defeza (MD) tinan ne’e prioriza estabelese Baze Militár Norte iha Aldeia Tata, Suku Ailelo, Postu Administrativu Hatolia A, Munisípiu Ermera.
Ministru Defeza Kontra Almirante Donaciano do Rosário da Costa Gomes ‘Pedro Klamar Fuik’, dehan, Baze Militár ne’e sei harii edifísiu ida, rezidénsia ba militár, ne’ebé projetu ne’e sei lansa iha tinan ida-ne’e.
“Projetu ne’e atu halo iha Tata Hatolia, sei sai hanesan Baze ba Batallaun Norte husi komponente terrestre nian,” Ministru Defeza hato’o ba jornalista sira iha ninia knaar fatin, Fatuhada, Tersa ne’e.
Ministériu Planeamentu, Investimentu no Estratéjiku (MPIE) liuhusi Sekretariadu Grande Projetu mak responsável ba konstrusaun ne’e, ne’ebé agora dezeñu ba konstrusaun konklui ona, nune’e tinan ne’e sei halo lansamentu fatuk dahuluk.
“Projetu ne’e sei lansa iha tinan ne’e ba Bairru Militár ho Baze Militár. Ita fó prioridade ba Baze Militár tanba presiza uluk estabelese baze posteriormente, ita dezenvolve Rezidénsia Militár iha tinan ida-ne’e,” nia akresenta.
Notísia relevante : MD lansa planu mestre ba konstrusaun baze militár no rezidénsia militár
Nia esplika, iha planu dezenvolvimentu ba MD iha planu tinan-lima tuir diretiva ministeriál ne’ebé mak MD hasai iha área Defeza, ne’ebé fundamentál atu dezenvolve mak infraestrutura.
“Governu iha ona tinan-rua ho balun, tinan-rua ba kotuk ita konseptualiza ba hanoin hotuhotu saida de’it mak ita hakarak iha infraestrutura ba ita-nia forsa. Tanba iha tinan rua kotuk ita kompleta dezeñu ba infraestrutura militár. Depois kompletu dezeñu ba ita-nia infraestrutura sira no depois tinan ida-ne’e mak implementa,” nia katak.
MD tinan ne’e foku ba infraestrutura Baze Militár ida iha nível kompañia.
“Infraestrutura ne’ebé ita halo mak kompleta kedan ho Rezidénsia Militár ba nível kompañia nian, kompañia sira-nia membru kuandu sira destakadu iha área ne’ebé mak sira responsabiliza, sira bele hamutuk ho família hela iha Bairru Militár,” nia katak.
Ministru garante, tinan ne’e sei hala’o lansamentu fatuk dahuluk ba konstrusaun Baze Militár.
“Tinan ida-ne’e, ha’u fiar ita komesa. Ministériu Defeza, MPIE no Grande Projetu sira mak sei lansa depois mak ita sei konstrui durante tinan-ida ka rua ba oin,” nia hato’o.
Jornalista : Natalino Costa
Editora : Julia Chatarina
