DILI, 17 Marsu 2026 (TATOLI)—Ministériu Públiku (MP) daudaun ne’e delega hikas kazu jogu online iha Oekusi ba Polísia Sientífika Investigasaun Kriminál (PCIC) hodi hakle’an investigasaun.
“Investigasaun kuaze finál, maibé iha buat balun ne’ebé presiza kompleta tan, ita haruka ona prosesu ne’e ba Ministériu Públiku, maibé daudaun Ministériu Públiku delega filafali ba PCIC iha semana kotuk hodi husu kontinua hakle’an investigasaun ba kazu ne’e,” Diretor PCIC, Vicente Fernandes i Brito, informa ba Jornalista Ajénsia TATOLI iha ninia knaar fatin, Tersa ne’e.
Notísia relevante : PSIK ho SNI buska apreensaun no desmantela jogu online ilegál iha Oekusi
Liuhusi MP nia relatóriu husu mós atu PCIC rekolla tan prova ne’ebé antes ne’e solisita.
“Ministériu Públiku husu ami atu kontinua investiga, rekolla tan provas ne’ebe antes ne’e ami remete ona,” nia akresenta.
Antes ne’e, iha loron 26 Agostu 2026, PCIC hamutuk ho Servisu Nasionál Intelejénsia (SNI) hala’o vizita supreza ida hodi halo buska, apreensaun no desmentela ba atividade ilegál rua hanesan esplorasaun jogu ilísitu kriminoza no burla informátika inklui rede scam call center transnasionál, ne’ebé instala husi empreza internasionál Seagull Resort husi nasaun Malázia iha otél Oé-Upun Rejiaun Administrativa Espesiál Oekusi Ambeno (RAEOA).
Atividade esplorasaun jogu ilísitu no kriminoza ne’e, ekipa PCIC no SNI konsege halo apreensaun ba objetu ka evidénsia sira hanesan, desktop unidade 87, laptop 13, telemovel iha 194, flashdisk tolu, access point ba wifi ida, starlink router rua nomós simcard Telkomsel Indonézia 135.
Objetu ba atividade burla informátika halo apreensaun ba desktop 58, laptop 4, mákina impresora ida, mákina sura osan ida, access point rua no telemovél 44.
Jornalista : Natalino Costa
Editora : Julia Chatarina
