DILI, 17 Marsu 2026 (TATOLI)—Prezidente Repúlika, José Ramos-Horta, tersa ne’e, liuhusi Dekretu Prezidente Repúblika Nu. 33/2026, 17 Marsu, nomeia Henriqueta Maria da Silva ba kargu Xefe Kaza Sivíl iha Palásiu Prezidensiál hodi substitui Jesuína Maria Gomes Fereira ne’ebé semana kotuk simu ona pose ba Vise-Ministra Negósiu Estranjeiru no Kooperasaun (MNEK).
Notísia Relevante: Prezidente Ramos-Horta nomeia Jesuína Gomes sai Vise-MNEK
Antes ne’e, Henriqueta Maria, asume hela kargu hanesan Adjunta Xefe Kaza Sivíl iha Palásiu Prezidensiál.
Bainhira Henriqueta nomeada ba Xefe Kaza Sivíl, Xefe Estadu nomeia fali nia Sekretaria Ezekutiva Graziela Fátima Liu Soares, ba Adjunta Xefe Kaza Sivíl.
Xefe Kaza Sivíl iha Palásiu Prezidensiál durante mandatu Prezidente Repúblika José Ramos-Horta nian iha ema na’in-tolu (3) mak troka malu ona hanesan Bendito dos Santos Freitas atuál Ministru Negósiu Estranjeiru no Kooperasaun, Jesuína Maria Gomes Fereira, atuál Vise-MNEK no ikus liu mak Henriqueta Maria.
TATOLI
