Profisionál Saúde iha HNGV laiha intensaun aat ba pasiente sira
DILI, 17 Marsu 2026 (TATOLI)—Diretór Servisu Apoiu Diagnostiku no Terapéutiku iha HNGV, Vidal de Jesus Lopes, hateten profisionál saúde hotu iha HNGV laiha intensaun aat ba pasiente sira.
Nia hato’o kestaun ne’e realasiona ona intervensaun membru parlamentu nasionál balun kestiona kona-na profisionál saúde sira-nia atendimentu ba pasiente sira-ne’ebé baixa liuliu labarik moras dengue ida-ne’ebé baixa no to’o ikus hakotu iis iha Hospital Nasionál Guido Valadares.
“Atu esklarese ba publiku relasiona kona-ba deputada sira-ne’ebé mak deklara iha Parlamentu Nasionál relasiona ho deputada ida-nia bei’oan ne’ebé mak mate iha HNGV, ha’u atu deklara katak husi profisionál saúde iha HNGV laiha intensaun aat ba pasiente sira, tanba profisionál saúde sira konsagra no reforsa ona juramentu prátiku,” Vidal Lopes dehan ba jornalista sira iha HNGV, ohin.
Nia esplika, médiku sira-nia intensaun ne’e mak atu ajuda fó tratamentu no fo kbiit hodi ajuda pasiente ne’e, tanba esforsu hotu-hotu halo maibé la konsegue salva pasiente.
“Tuir kronolojia husi departamentu pediatria ne’ebé mak relata mai katak ita-nia pasiente ne’e idade tinan ualu, baixa iha 21 Fevereiru no hakotu iis iha loron 09 fulan-Marsu. Husi inisiu tama, médiku sira halo tratamentu bazeia ba diagnosa ne’ebé mak iha. Agora investigsaun ba nia moras hanesan hasai raiu x, ct-scan, rezultadu raan sira ne’e iha hotu no ajustamentu medikamentu tratamentu bazeia ba rezultadu ne’ebé mak ita hetan. Esforsu hotu-hatu halo no komunikasaun husi mediku sira husi pediatria kuaze komunikasaun entre inan-aman no avo sira di’ak nafatin. Tanba ne’e, ami la halo atendimentu fora husi diagnosa maibé ami tuir SOP ne’ebé mak iha,” nia relata.
Nia dehan, kona-ba komunikasaun entre familia ho médiku mós buat hotu la’o di’ak, tanba atendimentu la’o tuir nafatin protokolu ne’ebé mak iha la’ós halo ba pasiente ne’e maibé ba pasiente hotu-hotu ho tratamentu hanesan no dignu.
“Nia moras iha komplikasaun uitoan, ha’u labele esplika nia diagnosa hotu, tanba nia ulun no pulmaun iha infeksaun ona. Agora, pasiente ne’e lori mai komesa afeta ona iha nivel konsiénsia signifika ko’alia ho ita karik ko’alia mesak ona, nune’e indika CT-scan katak moras balun iha kakutak no ajustamenu mós la’o tuir ida-ne’e,” nia esplika.
Atu aproveita oportunidade ida-ne’e, HNGV rekoñese katak buat balun ne’ebé parte HNGV la halo autodefeza iha okaziaun ne’e, maibé hanesan faz parte husi membru konsellu enkoraja nafatin profisionál saúde sira iha vontade tomak atu halo servisu tuir kbiit ne’ebé mak iha no halo asisténsia nafatin ba oan sira tanba sira presiza médiku sira-nia tulun.
Jornalista : Felicidade Ximenes
Editór : Cancio Ximenes
