DILI, 18 Marsu 2026 (TATOLI)—Ministériu Finansa liuhusi Diresaun Jerál Jestaun Patrimóniu Estadu haktuir ba implementasaun Dekretu-Lei nú.80/2022 kona-ba Regulamentu Veíkulu Estadu, iha nia artigu 6 kona-ba númeru limite veíkulu ne’ebé determina anuálmente.
“Liuhusi despaisu husi Ministra Finansa, Santina Viegas Cardoso fó sai katak númeru limite veíkulu ba Liña Ministériu, Instituisaun Estadu, Servisu Fundu Autónomu no Munisípiu ninian ba tinan 2026 mak hanesan 3.349,” referidu nota ne’ebé Ajénsia TATOLI asesu, Kuarta ne’e.
Despaisu ne’e prodús efeitu iha loron 01 Janeiru 2026. Ho nune’e, Diresaun Jerál Jestaun Patrimóniu Estadu kontinua informa ba Liña Ministériu no Instituisaun Estadu idaidak atu jere no kontrola utilizasaun veíkulu Estadu ba finalidade servisu Administrasaun Públiku nian tuir Dekretu-Lei nú.80/2022.
Notísia relevante : Governu promete hadi’a jestaun patrimóniu Estadu
Karreta unidade 298 no motorizada 2.014 mak halo leilaun iha tinan 2025. Programa ne’e parte integradu husi polítika Governu atu salvaguarda patrimóniu Estadu, liuliu atu hetan rendimentu mínimu husi prosesu alienasaun nian.
Aleinde atu redús kustu manutensaun no reparasaun ne’ebé boot liu ba sasán sira ne’ebé konsideradu prazu utilizasaun liu ona no la tuir ona nesesidade bázika Governu nian.
iha tinan 2024, ho deklarasaun no proposta ne’ebé mai husi liña ministeriál no instituisaun Estadu sira, nomós munisípiu sira hamutuk 30 ne’ebé kompostu husi liña ministeriál no instituisaun Estadu 20 no munisípiu 10, ne’ebé Komisaun Leilaun halo ona aprovasaun ba modalidade leilaun, ho modalidade konkursu públiku no konkursu internu ne’ebé Ministra Finansa omologa ona lista ne’ebé submete ona.
TATOLI
