OEKUSI, 18 Marsu 2026 (TATOLI) – Komunidade sira iha bairru Sikluli suku Costa sub-rejiaun Rejiaun Administrativa Espesiál Oekusi Ambeno (RAEOA), kontesta empreza Chenxiang Construction, tanba la konsidera komunidade sira-nia rai, plantasaun no uma bainhira reabilitasaun estrada kilometru ida-resin, hahú husi diresaun Sikluli to’o sítiu turístika relijioza Gruta Fatu-Suba.
Amaro Cofan, nu’udar portavós, hato’o kontestasaun komunidade sira-nian, liuhusi konferénsia imprensa, ne’ebé hala’o iha Fatu-Suba, kuarta ne’e.
“Primeiru kompañia tama laiha konsiderasaun ba xefe bairru, lia na’in-sira, komunidade iha bairru Sikluli, tanba komunidade mós lahatene kona-ba projetu agora la’o hela ne’e atu halo saida,” nia hateten liuhusi konferénsia imprensa, ohin.
Tuir nia, komunidade sira-nia hakarak, kompañia ezekuta projetu ne’e tenke iha legalidade, katak iha kontratu no kuadru avizu iha terrenu, tanba sei projetu ne’e la’o, mak fó impaktu ba komunidade nia ai-horis, rai no uma, sei loos mak responsabilidade.
“Tanba ne’e, ami-nia rekomendasaun ba xefe suku atu mai klarifika ba ami, sei kompañia fó karta koñesimentu, entaun tenke esplika, tanba ami la impede dezenvolvimentu maibé ami husu de’it agora estrada ona ami-nia sasán, ai-horis no ai-han balu iha to’os laran, atu halo indemnizasaun ne’e oinsa, tanba kompañia estraga daudaun ona, ne’ebé ami sei hein klarifikasaun to’o hetan nia solusaun, kompañia mai tama nonok de’it laiha koñesimentu ba ami nu’udar bairru laran,” nia hateten.
Notísia relevante:MOP konsidera reabilitasaun estrada Ataúru atu promove setór turizmu
Antónino Sales dos Reis, nu’udar komunidade reforsa-tan, rai ne’ebé kompañia hahú suru daudaun, estraga ona ai-marungi huun 50-resin, ai-farina huun 200 inklui lakero no sasán seluktan.
“To’os ne’e la’ós rai Estadu maibé misaun nian husi parte igreja, durante tinan 26 ha’u mak serbisu iha to’os laran ne’e, ha’u mak kuda marungi huun 50-resin, ai-farina 200-resin, lakeru no ai-oan sira seluk tan. Ha’u hakfodak tanba kompañia kee antes ona, ha’u sa’e mai haree to’os moos ona, ne’ebé ha’u husu ba kompaña tenki reponsabiliza, tanba ne’e ha’u kolen,” nia hateten.
Hatan ba preokupasaun sira-ne’e, Xefe Suku Costa, Francisco Colo, esplika, antes ne’e empreza submete ona karta koñesimentu, no autoridade komunitáriu mós hala’o ona ekontru ho komunidade sira iha bairru Sikluli hodi informa kona-ba prezensa konstrusaun ne’e.
“Ha’u esplika ona iha loron 15 Marsu semana kotuk, ha’u rasik mai hasoru ona sira iha bairru Sikluli, ko’alia ba asuntu ne’e, ha’u esplika ba sira, katak projetu ne’e mai husi programa Governu, hanesan autoridade suku, bainhira iha karta koñesimentu ba suku, ha’u tenke koopera tanba ne’e programa husi Governu, depois kuandu afeta ba ai-oan, rai no uma, ita sei ko’alia ho parte relevante sira hanesan terra propriedade no agrikultura inklui obra públika, ita labele iha hanoin atu impede ba programa Governu nian,” nia klarifika.
Responsavel Empreza Donal Pires, afirma, prezensa empreza iha terrenu bazea ba orden serbisu ne’ebé Governu atribui, hodi ezekuta serbisu fiziku nu’udar projetu emerjénsia, tanba tempu badak sei realiza seremónia kultura iha fatin ne’e, atu hahú konstrusaun.
“Ne’ebé, husi kompañia ami prontu atu kolabora komunidade no autoridade loká sira atu haree ba serbisu ida-ne’e. tanba projetu atu reabilita estrada ho nia distánsia kilometru 1-resin, maibé afeta ba komunidade nia sasán ami husi kompañia sei koordena ho parte Governu atu haree asuntu ne’e, tanba ami mai serbisu de’it,” nia hateten.
Entretantu, observasaun Jornalista Ajénsia Tatoli,I.P nota, iha terrenu Empreza Chenxiang hahú halo ona eskavasaun ba fatin rai materiál, no ke’e komunidade sira-nia to’os hodi rezulta estrada plantasaun, ai-farina, marunge no seluktan.
Jornalista: Abílio Elo Nini
Editór: Rafael Ximenes de A. Belo
