VIKEKE, 18 Marsu 2026 (TATOLI)—Prezidente Autoridade Munisípiu (PAM) Vikeke, Francisco C. S. de G. Soares, informa vizita Primeiru-Ministru (PM), Kay Rala Xanana Gusmão iha Munisípiu Vikeke adi’a bá 27 Marsu.
“Programa vizita Primeiru-Ministru mai Munisípiu Vikeke atu haree kondisaun mínima implementasaun podér lokál no desentralizasaun administrativa. Tuir oráriu ne’e loloos hala’o 18 Marsu maibé iha asuntu enkontru iha nasionál, nune’e Primeiru-Ministru adi’a,” Francisco hateten iha salaun Administrasaun Munisípiu Vikeke, Kuarta ne’e.
Nia haktuir, daudaun ne’e, Autoridade Munisípiu Vikeke instala ona komisaun ida hodi prepara ba PM nia vizita ne’e.
“Ha’u lakohi iha vizita PM ne’e ita hatudu liman ba malu. Ida-ne’e ema bele nota katak ita seidauk prontu hakat ba desentralizasaun no podér lokál, tanba vizita PM ne’e atu halo avaliasaun ba kondisaun mínima ba desentralizasaun no podér lokál,” nia hato’o.
Entretantu, Administradór Postu Administrativu Ossú, José da Silva Amaral ‘Radekiu’, deklara prontu koopera ho vizita PM ne’e.
“Ami autoridade sira prontu no koopera ho autoridade munisípiu hodi simu ita-nia Primeiru-Ministru ne’ebé mai vizita ita-nia rai Vikeke. Ami sei apoiu tomak ba PAM no ami sei mobiliza ami-nia populasaun para partisipa,” nia tenik.
Iha fatin hanesan, Prezidente Komisaun Organizadora atuál Diretór Servisu Saúde Munisípiu Vikeke, Ajaksono M. Soares, relata kona-ba preparasaun vizita PM nian parte komisaun daudaun ne’e halo hela servisu sira hanesan prepara fatin no palku sira hodi hein PM.
Vizita PM nian ne’e Governu sentrál aloka orsamentu hamutuk rihun $7 hodi organiza atividade. Orsamentu ne’e aloka ba konsume no sira seluk.
Jornalista: Vitorino Lopes da Costa
Editór: Xisto Freitas da Piedade
