DILI, 19 Marsu 2026 (TATOLI)—Kampiaun ba primeira divizaun Liga Futeból Femininu Timor-Leste (LFFTL) sei deside iha jogu ikus, jornada 18, entre AD SLB no S’amuser Football Club.
Kompetisaun primeira divizaun LFFTL seidauk serteja ekipa ne’ebé mak sai kampiaun mezmu to’o jornada 17 S’amuser FC lidera tabela klasifikasaun ho pontu 44, enkuantu AD SLB iha segundu lugár ho pontu 42.
Ekipa rua sei hala’o jogu determinasaun jornada 18 ne’ebé tuir oráriu sei hala’o iha Kampu Federasaun Futeból Timor-Leste (FFTL), Bairros dos Grilos, Domingu (22/03/2026), iha-ne’ebé S’amuser presiza pontu ida (1), enkuantu AD SLB tenke manán hodi rekolla pontu tolu (3).
Maski nune’e, istorikamente primeira divizaun LFFTL époka 2025-2026, S’amuser manán ho skor 3-1 kontra AD SLB iha volta dahuluk nune’e obrigadu AD SLB tenke vigansa (balas dendam) bainhira iha ambisaun hakarak sai kampiaun.
Notísia relevante: Buibere manán Akadémika 2-1, Kulugisa sofre golu 18-0 husi S’amuser
Entretantu, tabela klasifikasaun LFFTL S’amuser FC lidera ho pontu 44, rezultadu manán 14, impata rua (2), derrota ida (1) no produtividade golu (+/-) 88, enkuantu AD SLB manán 13, impata tolu (3), derrota ida (1) ho totál pontu 42 no produtividade golu (+/-) 137.
Buibere FC iha pozisaun datoluk ho pontu 39, Maudoko ho pontu 35 iha pozisaun dahaat, Maranatha okupa pozisaun dalimak ho pontu 27, Akadémika iha tabele daneen hafoin rekolla pontu 19, Na’in-Feto FC totál pontu 18 ne’ebé iha pozisaun dahitu (7) no UNITAL iha pozisaun daualuk ho pontu 15.
Enkuantu, ekipa rua seluk eleminadu husi kompetisaun primeira divizaun hanesan VDL FC okupa iha pozisaun dasiak hafoin rekolla pontu hitu (7) no Kulugisa FC laiha pontu hodi rezulta iha pozisaun ikus tabela klasifikasaun primeira divizaun LFFTL.
Jornalista: Natalino Belo
Editór: Xisto Freitas da Piedade
