DILI, 19 Marsu 2026 (TATOLI)—Ministru Justisa, Sergio Hornai, hateten prosesu konstrusaun estádiu foun ho padraun internasionál no kampu multifunsun daudaun ne’e sei iha prosesu negosiasaun entre liña ministeriál sira.
“Ita iha negosiasaun entre Ministériu Planeamentu Investimentu Estratéjiku, Ministériu Juventude, Desportu, Arte no Kultura no mós Ministériu Justisa inklui Federasaun Futeból Timor-Leste, sei haree terrenu ida-ne’ebé mai konviniente liu atubele konstrui estádiu,” nia dehan ba jornalista sira iha resintu Palásiu Governu, Kinta ne’e.
Nia esplika Tasi-Tolu la konviniente, entaun ministériu sei identifika fali terrenu seluk husik Tasi-Tolu.
“Ita sei haree rai ida-ne’ebé mak di’akliu. Se Tasi-Tolu dehan labele, ita tenke buka opsaun seluk atu atribui ba federasaun hodi konstrui estádiu, tanba estádiu importante ba ita-nia joven sira ba modalidade futeból. Ita haree modalidade futeból sai hanesan primadona ida ba atividade futeból iha Timor-Leste,” Hornai subliña.
Notísia relevante: Nelyo Isaac: Posibilidade estádiu foun sei konstrui iha Tibar
Governante ne’e fundamenta, únika solusaun ne’ebé liña ministeriál sira halo mak identifika rai seluk hodi konstrui estádiu para akomoda juventude, adeptu no ema sira-ne’ebé hakarak estabelese klube.
“Estádiu ne’e posibilidade ita hotu halo atividade nasionál no mós eventu internasionál sira-ne’ebé eziste jogu home and away, entaun husi estádiu ne’e bele akomoda,” Ministru ne’e esplika.
Kona-ba identifikasaun rai iha Tibar, membru Governu ne’e informa, ministériu prontu, sé mak sai hanesan na’in ba projetu ne’e konserteja projetu ne’e ba timorona hotu.
“FFTL iha interesante ho ita-nia Ministériu Juventude, Desportu, Arte no Kultura, atubele agrupa modalidade ida importante. Se ita dezenvolve ho di’ak sei sai indústria ida ba futuru, tanba talentu joven sira gosta futeból. Ezemplu hanesan Gali Freitas, João Pedro no sira seluk ita komesa fa’an ona ba li’ur. Ida-ne’e sai motivasaun atu ita dezenvole estádiu,” Hornai subliña.
Jornalista: Osória Marques
Editór: Xisto Freitas da Piedade
