DILI, 18 Marsu 2026 (TATOLI)—Governu liuhusi Ministériu Juventude, Desportu, Arte no Kultura (MJDAK), daudaun ne’e haree ona fatin iha área Tibar, Munisípiu Likisá nian hodi konstrui estádiu foun no kampu futsál padraun internasionál.
“Tanba ne’e, daudaun ita haree fatin iha Likisá no Tibar karik posibilidade hetan, sei komunika para oinsá sai fatin ba futuru estádiu nian,” Ministru Juventude, Desportu, Arte no Kultura, Nelyo Isaac Sarmento dehan ba jornalista sira iha CYCC, Komoro, Dili, Kuarta ne’e.
Nia esplika, rai Tasi-Tolu loloos iha serteja, maibé tanba mosu diferensa opiniaun husi parte igreja, sosiedade sivíl, tanba ne’e Governu rona ema hotu nia preokupasaun.
“Tanba ne’e, ita pendente hela. Signifika katak ita buka posibilidade hotu-hotu. Se laiha, hakarak ka lakohi tenke utiliza de’it rai iha Tasi-Tolu ne’e,” nia hateten.
Tuir nia katak Governu iha rai barak maibé rai sira-ne’e foho hotu, sei hatún foho tenke iha investimentu boot no osan mós tenke boot.
“Ha’u fiar katak ida-ne’ebé intensaun di’ak husi federasaun, entaun Governu tenke oferese rai nune’e ita halo kolaborasaun ida entre federasaun. Setór privadu ho Governu bele hamutuk konstrui buat ruma,” Nelyo dehan.
Ministru Nelyo hatutan parte Governu identifika hela rai balun, maibé hektare ida (1) de’it, não me diga to’o ba kampu internasionál. Mínimu tenke hetan hetare tolu (3) to’o lima (5).
Maibé, governante ne’e dehan, bainhira laiha alternativu sei lori fali ba Konsellu Ministru atu haree filafali.
Kona-ba vizita Prezidente FIFA, Gianni Infantino mai Timor-Leste, Nelyo informa, nia parte seidauk hetene loos atu mai halo lansamentu ba estádiu foun ka estádiu munisipál.
“Ita lahatene maibé ba estádiu foun ne’e, pur enkuantu ha’u seidauk iha informasaun fatin iha-ne’ebé. Ha’u hatene maka buka hela fatin atu harii estádiu, tanba Tasi-Tolu ha’u seidauk bele garante 100%,” nia tenik.
Jornalista: Osória Marques
Editór: Xisto Freitas da Piedade
