DILI, 19 Marsu 2026 (TATOLI)—Millenium Challenge Account Timor-Leste (MKA-TL) halo transferénsia materiál patrimóniu Estadu ne’ebé durante ne’e sira utiliza no entrega fali ba Bee Timor-Leste (BTL, E.P) hodi kontinua implementa programa bee no saneamentu iha Timor-Leste.
Atividade ida-ne’e organiza ho objetivu atu formaliza transferénsia patrimóniu no rezultadu dokumentu projetu sira-ne’ebé implementa ona husi MKA-TL, ba BTL, E.P hodi asegura sustentabilidade no kontinuidade ba servisu sira iha setór bee no saneamentu.
Prezidente Bee Timor-Leste, Empreza Públiku (BTL, E.P), Gustavo da Cruz, hateten atividade ohin nian mak asina akordu transferénsia patrimóniu Estadu husi MKA-TL mai iha BTL, E.P, ne’ebé kaer kompeténsia kona-ba asuntu bee no saneamentu.
Projetu ne’e la’o dezde iha tinan 2022 maibé tanba ho mudansa polítika iha Estadu Unidu Amérika (USA) taka hodi ajuda esterna nian inklui ajuda grand millaun $420 ba iha Timor-Leste liuliu iha projetu saneamentu.
“Ho desizaun ida-ne’e mak tenke entrega fali patrimóniu sira-ne’ebé durante ne’e MKA-TL utiliza hodi halo servisu obrigatóriu entrega ba instituisaun ne’ebé hanesan na’in ba projetu saneamentu ne’e mak BTL, materiál balun entreva Ministériu Edukasaun no MESSK,” Prezidente BTL, E.P informa ba jornalista sira iha edifísiu BTL, E.P Kaikoli, ohin.
Husi transferénsia patrimóniu hirak ne’e bele ajuda sira redus kustu ba sosa ekipamentus nian no nia kompremetidu atu implementa materiál sira ne’e ba servisu ne’ebé ligadu ho sanemanetu iha Timor-Leste, tamba husi parte MKA-TL mós sei hako monitorizasaun ba implementasaun projetu saneamentu katak instituisaun relevante uza duni materiál tranferénsia sira-ne’e ka lae.
Iha biban ne’e tuir Diretór Ezekutivu MKA-TL, Constáncio da Conceição Pinto, hateten BTL, E.P mós sai hanesan instituisaun parseria ba MKA-TL hodi implementa kontinuidade ba programa saneamentu ninian.
“Ha’u bele dehan katak patrimóniu ne’ebé entrega ba BTL ho ninia totál fundu hamutuk rihun $100-resin, ne’ebé mak ami aloka mai iha ne’e, kompostu husi viatura, laptop no mobiliáriu balun,” nia dehan.
Nune’e, nia dehan, semana oin sira sei halo tranferénsia patrimóniu Estadu ba BTL, E.P tanba iha loron 14 fulan-Abríl MKA-TL atu taka ona, ne’ebé sira tenke aselera lalais transferénsia ida-ne’e.
“Ha’u fiar katak projetu ne’e bele implementa ba oin bele ho modalidade lahanesan tanba ne’e ha’u husu ba BTL atu implementa ho didi’ak tuir programa saneamentu nian tanba ekipa sei halo monitorizasaun liuliu ba estudu preelemináriu baze dezeñu (estudu viabilidade) hafoin tama ba prosesu konstrusaun projetu saneamentu nian,” nia hateten.
Entretantu, sasán patrimóniu ne’ebé MKA-TL tranfere ba BTL, E.P mak hanesan viatura operasionál ida, sasán eletróniku no sasán mobiliáriu sira. Nune’e atividade ne’e akompaña direta husi Diresaun Jerál Patrimóniu Estadu hodi sai testamuña ba atividade refere inklui husi parte MCC iha Timor-Leste.
Jornalista : Alexandra da Costa
Editór : Cancio Ximenes
