MS prepara rekursu umanu atu servisu iha edifísiu pediatria andar lima iha HNGV
DILI, 19 Marsu 2026 (TATOLI)—Vise Ministru Fortalesimentu Instituisionál Saúde, José dos Reis, hateten Ministériu Saúde prepara rekursu umanu hodi bele servisu iha edifísiu pediatria andar lima iha Hospitál Nasionál Guido Valadares.
“Kona-ba rekursu umanu agora daudaun iha prosesu nia laran. Ita iha hela vaga ida-ne’e atu hahú, Ministra Saúde fó ona orientasaun atu haree didi’ak prosesu tomak, atu oinsá ema-ne’ebé mak atu servisu hodi nune’e funsionamentu ne’e la’ó di’ak liután. Ita presiza profisionál saúde hira depois mak ita-boot sira haree,” Vise Ministru Fortalesimentu Instituisionál Saúde ne’e hateten ba jornalista sira iha Novu Turizmu, ohin.
Nia esplika, prosesu aprovizionamentu ba ekipamentu médiku no naun médiku agora prosesa hela iha CNA.
“Prosesu aprovizionamentu ba ekipamentu médiku no naun médiku prosesu la’o ona iha CNA, ne’ebé ita hein katak depois konstrusaun ne’e hotu, nia ekipamentu sira mós prienxidu atu nune’e bele funsiona ona,” nia dehan.
Nia afirma, prosesu ekipamentu sira-ne’e dedikadu ba iha andar lima bainhira ospitál ne’e funsiona ona mak profisionál saúde sira hala’o servisu.
“Alvu atu rekrutamentu husi Ministériu Saúde ne’e bazeia ba kama no ninia rasiu hotu depois mak ita haree,” nia informa.
Iha sorin seluk, Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, informa Hospitál Nasionál Guido Valadare haruka ona mapeamemtu ba Ministériu Saúde atu halo rekrutamentu ba profisionál saúde sira.
“Planu ba tiha ona, rekrutamentu mós ba tiha ona hein resposta karta husi Ministériu Saúde. Ita presiza rekruta 300 pesoa, tanba rekrutamentu ne’e ba profisionál saúde permanente iha HNGV,” Vidal de Jesus Lopes esplika.
Nia dehan, Hospitál Nasionál Guido Valadares kontinua presiza profisionál saúde liuliu ba espesilista ba pediatria nian.
“Klaru kona-ba rekursu umanu neste momentu ita nafatin presiza, no ita nafatin fó hanoin ba Ministériu Saúde atu investe ba rekursu umanu liuliu ba espesilista ba pediatria nian,” nia dehan.
Entretantu, duadaun ne’e mediku espesilista pediatria timoroan hamutuk na’in-lima.
Jornalista : Felicidade Ximenes
Editór : Cancio Ximenes
