VIKEKE, 19 Marsu 2026 (TATOLI)—Xefe Suku Makadike de Baixo, Postu Administrativu Uatulari, Munisípiu Vikeke, Rogério da Silva informa, tinan 2026 ne’e, Suku Makadike de Baixo sei hetan uma dignu hamutuk unidade 21 oferese ba populasaun iha aldeia hitu.
“Iha tinan ida-ne’e ami-nia suku hetan uma dignu hamutuk unidade 21 husi programa Vise Primeiru-Ministru no Ministru Koordenadór Asuntu Abitasaun Komunitária, Mariano Assanami Sabino,” Rogério da Silva ba TATOLI iha Postu Vikeke Vila, Kinta ne’e.
Notísia relevante: https://tatoli.tl/2025/10/17/assanami-oje-2026-kontinua-prioriza-programa-abitasaun-komunitariu-dignu/
Autoridade Suku Makadike de Baixo ne’e hatutan prosesu uma dignu ba abitante Suku Makadike de Baixo parte ekipa husi Vise-Ministru nian bá halo ona verifikasaun.
“Nune’e mós parte téknika husi vise primeiru-ministru nian sei bá ha’u-nia suku hodi halo levanatamentu dadus kona-ba rai nian, depoiz ida-ne’e ramata tama ona prosesu implementasaun,” nia subliña.
Uma dignu unidade 21 ba Suku Makadike de Baixo ne’e sei koloka ba aldeia hitu no kada aldeia sei hetan uma tolu (3) ho medida metru 10×12.
“Kritériu atu hetan ne’e komforme ema eskolla. La haree ba ema vulneralvel sira de’it. Bainhira uma dignu hotu kada fulan benefisiáriu sei selu $50 iha kada fulan, maibé ema sei haree família benefisiáriu sira-nia rendimentu kada fulan hetan $500 ka lae. Se kada fulan $500, entaun kada fulan selu $50,” nia tenik.
Jornalista: Vitorino Lopes da Costa
Editór: Xisto Freitas da Piedade
