DILI, 21 Marsu 2026 (TATOLI) – Ekipa futeból femenina AD SLB kompromete atu trava vitória S’amuser FC iha jogu desizivu iha jornada 18.a Primeira Divizaun Liga Futeból Femenina Timor-Leste (LFFTL).
Treinadór AD SLB, Filomeno Junior da Costa, dehan katak jogu kontra S’amuser FC sei sai determinte ba definisaun kampiaun. Nune’e, ekipa prepara ona estratéjia liuhusi analiza adversáriu ninia forsa no frakeza hodi asegura pontu iha jogu ne’ebé sei hala’o iha kampu Federasaun Futeból Timor-Leste (FFTL), Bairro dos Grilhos, iha domingu (22/03/2026).
“Aban ami sei hatudu jogu ne’ebé diak no gaña vitória tanba dalan laiha atu empata ka lakon. Ami tenki manán”, Filomeno Junior hateten iha Xanana Sport Center, sábadu ne’e.
Junior rekoñese katak iha jogu ronda dahuluk ekipa hetan derrota hasoru S’amuser FC. Maibe, nu’udar treinadór, nia afirma katak prepara ona tátika no estratéjia foun hodi hetan vitória, tanba maioria jogadór AD SLB mak selesaun nasionál no iha kondisaun másima ba jogu.
“Ami fiar an no garante bele manán iha jogu aban”, nia garante.
Kapitaun ekipa AD SLB, Vanessa Fernandes, mós afirma katak ekipa prontu atu implementa estratéjia husi treinadór no sei halo esforsu másimu hodi hetan pontu tolu bainhira kontra S’amuser, atu sai kampiaun iha Primeira Divizaun LFFTL époka 2025-2026. “Ami prontu no fiar an aban sei manán”, Vanessa dehan ho otimista.
To’o agora, kompetisaun Primeira Divizaun LFFTL seidauk iha kampiaun definitivu. Iha jornada 17.a, S’amuser FC lidera tabela klasifikasaun ho pontu 44, enkuantu AD SLB iha segunda pozisaun ho pontu 42.
Jogu entre ekipa rua ne’e sei determina kampiaun, iha ne’ebé S’amuser FC presiza pontu ida de’it atu asegura títulu, enkuantu AD SLB obrigadu tenke manán atu rekolla pontu 3 no ultrapasa rivál.
Tuir tabela klasifikasaun LFFTL, S’amuser FC hetan pontu 44 husi vitória 14, empata 2, derrota 1 ho produtividade golu (+/-) 88. Enkuantu AD SLB hetan pontu 42, ho manán 13, empata 3, no derrota 1 no produtividade golu (+/-) 137.
Iha pozisaun seluk, Buibere FC oukupa fatin datoluk ho pontu 39, tuir Maudoko iha pozisaun dahaat ho pontu 35. Maranatha oukupa pozisaun dalimak ho pontu 27, Akadémika iha pozisaun daneen ho pontu 19, no Nain-Feto FC ho pontu 18, iha pozisaun dahituk. UNITAL iha pozisaun daualuk ho pontu 15.
Enkuantu, VDL FC no Kulugisa FC elimina ona husi kompetisaun, ho VDL FC iha pozisaun dasiak ho pontu 7 no Kulugisa FC iha pozisaun ikus ho pontu zero.
Notísia relevante: Kulugisa FC serteja ona tun bá segunda divizaun LFFTL
Jornalista: Natalino Belo
Editora: Maria Auxiliadora
