“Hadomi ita-nia Floresta no Animál Fuik sira” mak tema ba Maratona Internasionál Dili 

AILEU, 21 Marsu 2026 (TATOLI) – Xefe Kaza Sivíl Prezidénsia Repúblika, Henriqueta Maria da Silva, informa katak Prezidente Repúblika, José Ramos-Horta, hili tema “Hadomi ita-nia Floresta no Animál Fuik sira”, ba Maratona Internasionál Dili, ne’ebé sei akontese iha 08 Agostu tinan ne’e.

“Prezidente Repúblika ho haksolok loke dalan ba eventu boot ida ne’ebé sei lori naran Timor-Leste ba mundu, hodi promove ita-nia floresta no animál fuik sira hanesan ativu turístiku neʼebé iha valór ekonómiku aas. Iha 08 Agostu 2026, ita sei simu Dili International Marathon, ho tema espesiál neʼebé Prezidente Repúblika rasik hili”, Xefe Kaza Sivíl dehan iha Sede Suku Seloi-Kraik, postu administrativu Aileu Vila, munisípiu Aileu, ohin.

Henriqueta da Silva esplika katak Maratona Internasionál Dili ida-ne’e la’ós de’it eventu desportivu, maibé mós plataforma ekonómika neʼebé sei kria empregu temporáriu no permanente ba organizadór, fornesedór, otél, restaurante, transporte, no ba setór turizmu tomak.

Aleinde ne’e, atrai investimentu iha infraestrutura turístika no servisu sira, promove produtu lokál ba partisipante sira husi rai-li’ur, hametin imajen Timor-Leste nu’udar destinasaun turístiku ambientál ne’ebé auténtiku no sustentavel.

“Liuhusi eventu ida-ne’e, mundu sei hatene katak Timor-Leste iha rikusoin naturál ne’ebé presiza ita proteje no valoriza. Atleta sira husi rain-li’ur ne’ebé mai partisipa, sira sei konvida atu fó apoiu ba projetu reflorestasaun ne’ebé komunidade rasik lidera, Ne’e signifika katak ekonomia turizmu mós kontribui diretamente ba konservasaun”, Henriqueta dehan.

Nia adianta katak partisipante sira sei iha kategoria oioin iha maratona tomak, meia maratona, korrida 10km ba atleta paralímpiku nian, no korrida 5km ne’ebé labarik no família hotu bele partisipa.

“Sira sei halai liuhusi tasi-ibun Dili nian ne’ebé furak, haree ita-nia foho, ita-nia rai, no sira-nia laran sei sente duni katak sira kontribui ba futuru ekonómiku neʼebé bazeia ba sustentabilidade ambientál. Entaun, ho maratona ida-ne’e, Prezidente Repúblika fó oportunidade ba ita hotu atu sai embaixadór ba ita-nia ekonomia verde, liuhusi desportu, turizmu, no solidariedade globál”, nia dehan.

Jornalista: Osória Marques

Editora: Maria Auxiliadora