DILI, 21 Marsu 2026 (TATOLI) – Ekipa futeból femenina S’amuser Football Club (FC) garante sei sai kampiaun iha taxa Primeira Divizaun Liga Futeból Femeninu Timor-Leste (LFFTL) bainhira kontra AD SLB ne’ebé sei hala’o iha Kampu Federasaun Futeból Timor-Leste (FFTL), iha domingu (22/03/2026).
Treinadór S’amuser FC, Julião dos Reis Mendonça, dehan ekipa iha preparasaun másimu no pronto atu hetan pontu bainhira kontra ekipa AD SLB, nune’e sai kampiaun iha liga époka 2025-2026 ne’e.
“Ami prontu ona atu kontra AD SLB”, Julião Mendonça hateten iha Xanana Sport Center, Bairro dos Grilho, sábadu ne’e.
Kapitaun S’amuser F, Modenizia Martins, hateten nu’udar jogadora preparada no garante sei manán AD SLB, iha-ne’ebé nia parte sei fó motivasaun ba ekipa hodi hasa’e espíritu jogu nune’e sai vensedora.
“Ami hakarak marka istória iha jogu aban, minutu 90 sei determina”, Modenizia afirma.
Jogu entre ekipa rua ne’e sei determina kampiaun, iha ne’ebé S’amuser FC presiza pontu ida de’it atu asegura títulu, enkuantu AD SLB obrigadu tenke manán atu rekolla pontu 3 no ultrapasa rivál.
Tuir tabela klasifikasaun LFFTL, S’amuser FC hetan pontu 44 husi vitória 14, empata 2, derrota 1 ho produtividade golu (+/-) 88. Enkuantu AD SLB hetan pontu 42, ho manán 13, empata 3, no derrota 1 no produtividade golu (+/-) 137.
Iha pozisaun seluk, Buibere FC oukupa fatin datoluk ho pontu 39, tuir Maudoko iha pozisaun dahaat ho pontu 35. Maranatha oukupa pozisaun dalimak ho pontu 27, Akadémika iha pozisaun daneen ho pontu 19, no Nain-Feto FC ho pontu 18, iha pozisaun dahituk. UNITAL iha pozisaun daualuk ho pontu 15.
Enkuantu, VDL FC no Kulugisa FC elimina ona husi kompetisaun, ho VDL FC iha pozisaun dasiak ho pontu 7 no Kulugisa FC iha pozisaun ikus ho pontu zero.
Notísia relevante: AD SLB hakarak “trava” vitória S’amuser FC iha jogu desizivu
Jornalista: Natalino Belo
Editora: Maria Auxiliadora
