DILI, 21 Marsu 2026 (TATOLI) – Superintendente Polísia Julia da Gama lamenta ho desizaun Komandante Jerál PNTL, Komisáriu-Jerál Polísia Henrique da Costa, ne’ebé solisita ba Ministru Interiór, Francisco da Costa Guterres, hodi kansela nia husi lista promosaun diviza ba ofisiál superiór.
Julia da Gama loloos tama iha lista ne’ebé Ministériu Interiór publika iha loron 19 Marsu, promosaun ba ofisiál superiór nai’n-63 iha sábadu ne’e, maibé iha minutu ikus suspende nia tanba razaun katak envolve iha infrasaun disiplinár.
“Ha’u-nia kazu ne’e la’ós krime agravadu, la’ós tentiva asaun, la’ós mós omisídiu ne’ebé grave. Ha’u la’ós balun be fa’an kupon ulun hitu, kada kupon rihun ida. Ne’e kualidade ida ne’ebé mais agravadu. Ha’u la koalia kontra orden, maibé ha’u kontra direitu ida ne’ebé ke hetan posibilidade loron ohin”, Julia Gama hateten ba jornalista sira iha Sentru Formasaun Polísia Komoro, ohin.
Nu’udar ofisiál superiór PNTL, Julia la sente triste ho desizaun ne’e, maibé hanesan membru lakon konfiansa ba nia komandante. “Tanba sá tenke triste? Feto ne’ebé brani luta hasoru diskriminasaun tenke foti risku, tanba nia hatene katak nia fuan boot atu simu nafatin risku sira ne’ebé iha. Ha’u hateten katak ha’u la lakon oportunidade más ha’u lakon konfiansa de’it”, nia afirma.
Nia la esplika detalla kona-ba kazu ne’ebé nia komete no halo nia la tuir promosaun, ne’ebé foin rejista iha 24 Fevereiru 2026.
Ba nia, situasaun ne’ebé daudaun enfreta ne’e hanesan lisaun boot ida ba ema hothotu, liuliu ba instituisaun no femenina PNTL ne’ebé mais kualifikadu no avansada ona.
“Ha’u husu ba eselénsia Primeiru-Ministru atu haree situasaun ida-ne’e. Tanba sá mak ha’u tenke hela”, nia lamenta.
Julia da Gama salienta katak maski kansela nia promosaun, maibé hanesan ema profisionál marka prezensa nafatin iha serimónia ne’e hanesan membru PNTL.
“Orden mak hateten ona katak ha’u hela, ha’u kontente nafatin no sempre luta atu aprezenta ba ita-nia instituisaun hodi eskrita katak buat ne’ebe kondena ona mai ne’e sala. Ida-ne’e mak ha’u sei luta ohin ba oin. Ha’u nafatin fó parabéns ba Komandante boot na’in-rua ne’ebé oras ne’e daudaun lidera hela ami”, nia hato’o.
Julia da Gama simu despaxu urjente iha sesta-feira husi Gabinete Komandante Jerál pur volta tuku 11h10 bainhira tuir gladi ba serimónia promosaun diviza nian, ne’ebé dehan katak nia tenke sai husi liña formatura. Nia relata katak despaixu ne’e asina husi Komandante Jerál PNTL, Komisáriu-Jerál Henrique da Costa.
“Ida ne’ebé pendente bele pendente no ida ne’ebé iha posibilidade atu promove ne’e bele promove, maibé tanba sá mak minutu ikus esklui ha’u”, nia kestiona.
Hatán ba kestaun ne’e, Ministru Interiór, Francisco da Costa Guterres, hateten disizaun kansela promosaun Julia da Gama ne’e hodi fó prazu fulan ualu hodi rezolve tiha problema ne’ebé iha mak foin halo fali promosaun ba nia.
“Ha’u labele ko’alia sai nia problema ne’e todan ka kaman, más karta ne’e mai prosesa iha oito meses hotu ka la hotu nia tenke ser promovidu. Ne’e iha despaixu klaru, ne’ebé ha’u la simu karta husi seluk, ha’u simu karta ida-ne’e de’it”, nia relata.
Lembra katak Ministériu Interiór promove, ohin, ofisiál superiór PNTL nain-62. Husi totál ne’e, ofisiál Superintendente Asistente na’in-23 promove ba Superintendente Polísia, Superintendente na’in-22 promove ba Superintendente Xefe, no Superintendente Xefe Polísia na’in-17 promove ba Komisáriu Asistente.
Notísia relevante: Ofisiál superiór PNTL na’in-62 promovidu, Xanana enfatiza servisu profisionál no dedikasaun
Jornalista: Natalino Costa
Editora: Maria Auxiliadora
