DILI, 21 Marsu 2026 (TATOLI) – Governu, liuhusi Ministériu Interiór, promove ofisiál superiór Polísia Nasionál Timor-Leste (PNTL) na’in-62 iha serimónia impozisaun diviza, ne’ebé realiza iha Sentru Formasaun Polísia, Komoro, ohin.
Tuir dadus husi Ministériu Interiór, loloos ofisiál superiór na’in-63 mak hetan promosaun. Maibé, iha minutu ikus Komandante Jerál PNTL, Komisáriu-Jerál Henrique da Costa, solisita ba Ministru Interior, Francisco da Costa Guterres, atu suspende promosaun ba Superintendente Polísia Júlia da Gama tanba envolve iha infrasaun displinár. Nune’e, ofisiál superiór nain-62 mak partisipa iha impozisaun diviza.
Husi totál ne’e, ofisiál Superintendente Asistente na’in-23 promove ba Superintendente Polísia, Superintendente na’in-22 promove ba Superintendente Xefe, no Superintendente Xefe Polísia na’in-17 promove ba Komisáriu Asistente.
Serimónia ne’e prezide husi Primeiru-Ministru, Xanana Gusmão, no akompaña husi Ministru Interiór, Francisco da Costa Guterres, Komandante Jerál PNTL, Komisáriu-Jerál Polísia Henrique da Costa, no Segundu Komandante Jerál PNTL, Komisáriu Pedro Belo. Partisipa iha eventu ne’e mak Vise-Primeiru-Ministru ba Asuntu Ekonomia no Ministru Turizmu no Ambiente, Francisco Kalbuadi Lay, no membru Governu seluk.
Iha diskursu, Xanana Gusmão parabeniza ofisiál superiór sira ne’ebé promividu no husu atu serbí ho profisionalizmu no responsabilidade.
“Imi sira ne’ebé foin hetan promosaun ha’u la dehan katak hein kle’ur ona, más imi serbisu iha imi idak-idak nia área, lalika fó obrigadu ba Nonu Governu. Devér Nonu Governu atu hadi’a tiha instituisaun hothotu ita-nia Estudu nian”, nia afirma.
Xefe Governu mós enfatiza katak Timor-Leste iha hela prosesu konstrusaun Estadu, no reforma institusionál atu asegura administrasaun públika ne’ebé efesiente.
Nia mós apela ba membru polísia atu husik prátika arte marsiál. “Tanba ida-ne’e mak husi apelu boot tebtebes ba ita tomak atu defende povu ida-ne’e, la’ós atu ajuda fali joven sira ne’ebé lakon tiha konxiénsia, estraga malu fali iha ita-nia komunidade nia leet”, nia fó hanoin.
Relasiona ho 20 Maiu, Xanana dehan daudaun Governu halo análize ida katak saida mak halo ona iha tinan lima, tinan 10, no agora tama ba tinan 24. “Saida mak di’ak, saida mak loos, saida mak aat, saida maka seidauk di’ak korrije. Ne’e mak iha prosesu mós ba ita boot sira-nia karreira nu’udar membru polísia. Ita korrije daudaun hodi harii ona sistema ida ne’ebé ikus mai imi hatene ona katak tuir ida-ne’e”, nia dehan.
Xanana realsa katak promosaun ne’e hanesan kompromisu ida atu idak-idak serbí rai ida-ne’e husi aspetu seguransa ninian, aprosima relasaun ho komunidade, inklui joven, hodi promove domin no dame iha rai-laran.
Iha biban ne’e, Xanana apela ba ofisiál superiór iha akademia polísia ne’ebé hetan promosaun atu hanorin no prepara ajente PNTL ne’ebé di’ak iha futuru.
Xefe Governu mós rekoñese katak promosaun ba ofisiál superiór PNTL ne’e feto ladún hetan oportunidade, maibé ba oin Governu sei mellora ida-ne’e. Maski nune’e nia kontente ho partisipasaun feto iha polísia kontinua maski la barak hodi enkoraja feto sira ne’ebé sai ona ajente polísia atu hatudu profisionalizmu iha serbisu hodi serbí nasaun no povu ho di’ak.
Iha fatin hanesan, Komandante Polísia Munisípiu Dili, Komisáriu Asisténte Orlando Gomes, hateten, ho promosaun ida-ne’e labele sai orgullu ida, maibé sai sasukat ida hodi mellora servisu ho di’ak liután.
“Hau ohin promove husi postu Superintendente Xefe Polísia ba Komisáriu Asistente Polísia. Ho promosaun ida-ne’e atu aumenta responsabilidade morál hodi ita haka’as mellora servisu ne’ebé di’ak ba nasaun no povu”, dehan.
Jornalista: Natalino Costa
Editora: Maria Auxiliadora
