DILI, 23 Marsu 2026 (TATOLI)—Bee Timor-Leste, Empreza Públika (BTL, E.P) kontribui hamutuk rihun $520 ba kofre Estadu iha trimestre dahuluk hahú husi fulan-Janeiru to’o Marsu tinan 2026.
Prezidente Bee Timor-Leste, Gustavo da Cruz, hateten fonte reseita iha tinan 2026 hamutuk rihun $520 ne’e halibur liuhusi taxa ne’ebé konsumidór sira selu loroloron ba BTL, E.P.
“Reseita ne’e rekolla liuhusi programa sira mak hanesan halo ligasaun foun ba bee, laboratóriu teste bee-moos, saneamentu (xupa sentina), kompañia sira fakar bee fo’er iha Tíbar, faan bee-moos no seluk tan,” Prezidente BTL informa ba jornalista sira iha salaun apuramentu CNE, Kolmera, ohin.
Aleinde ne’e, nia dehan, atu apoia programa hirak ne’e la’o di’ak normalmente tenke garante fornesimentu bee-moos ba komunidade ho másimu, tanba bee ne’ebé kualidade ne’e liuhusi kanalizasaun públiku.
“Hakarak hasa’e reseita tenke garante ita-nia fornesimentu bee-moos ho di’ak ba konsumidór, tanba se lae komunidade la selu entaun ita labele hetan reseita,” nia hateten.
Enkuantu, nia hatutan, iha tinan 2025 nia laran ne’e BTL, E.P konsege rekolla reseita hamutuk millaun $2,4 liuhusi programa sira ne’ebé estabelese ona iha BTL, E.P.
Jornalista : Alexandra da Costa
Editór : Cancio Ximenes
