VIKEKE, 24 Marsu 2026 (TATOLI)—Xefe Suku Uma-Tolu, Postu administratrivu Lakluta, Munisípiu Vikeke, Eduardo Soares, husu Ministériu Agrikultura Peska, Pekuária no Floresta (MAPPF) kontinua halo normalizasaun ba irrigasaun Ai-Tara, Lakluta.
“Iha fulan kotuk (Fevereiru) Ministériu destaka ekipamentu pezadu ida ba irrigasaun Ai-Tara hodi halo normalizasaun ba irrigasaun, maibé ekipamentu ne’e iha fulan-Marsu avaria nune’e foin lalais ne’e ekipa sira husi nasionál mai tula bá Dili halo manutensaun,” Eduardo ba TATOLI iha Postu Lakluta, Tersa ne’e.
Autoridade ne’e relata normalizasaun ne’ebé hala’o iha fulan-Fevereiru ne’e bee tama ona bá natar laran, maibé kondisaun husi mota nian mak seidauk di’ak hodi fornese bee ba natar.
Notísia relevante: MAPPF destaka eskavatór ba Postu Lakluta normaliza irrigasaun Ai-Tara
“Tanba ne’e mak ami husu ministériu atu kontinua dezsaka ekipamentu pezadu hodi normaliza irrigasaun iha parta mota nian. Se la’e tinan ida-ne’e agrikultór sira labele halai natar,” Eduardo haktuir.
Nia dehan parte autoridade mós komunika ona nasionál katak ekipamentu pezadu sei mai fali iha fulan-Abríl.
Natar iha área Ai-Tara ho totál hamutuk ektare 146. Husi númeru ne’e, ektare 56 ativadu maibé ektare hamutuk 90 sai abandonadu nune’e agrikultór sira halo fali ba toos.
Postu Lakluta iha suku haat kompostu husi Dilór, Uma-Tolu, Ahik no Laline ho totál abitante hamutuk 8.123 husi uma-kain 1.907.
Jornalista: Vitorino Lopes da Costa
Editór: Xisto Freitas da Piedade
