INFPM rezolve ona ai-moruk Sodium Valproate “stock out” iha HNGV
DILI, 24 Marsu 2026 (TATOLI)—Diretór Servisu Apoiu Diagnostiku no Terapéutiku iha HNGV, Vidal de Jesus Lopes, klarifika INFPM rezolve ona ai-moruk Sodium Valproate ne’ebé mak públiku sira kestiona iha mídia sosiál katak ai-moruk referida stock out iha Hospitál Nasionál Guido valadares.
“Ai-moruk ne’ebé mak públiku sira kestiona iha mídia sosiál ne’e loos duni, HNGV estoke mamuk no hodi kalan iha tuku 09h00 hanesan ne’e, INFPM rezolve kedas no haruka kedas item sira-ne’e mai HNGV no ohin ne’e atu kontaktu pasiente ne’e mai foti nia ai-moruk,” Vidal de Jesus Lopes hatetenn ba jornalista sira iha nia kna’ar fatin HNGV, Bidau, ohin.
Nia dehan, médiku sira sei kontaktu pasiente ne’e mai foti ai-moruk, tanba kopia reseita sira fó ba hela ho númeru kontaktu hakerek hela, banhira item ne’e iha fali ona mak médiku sira kontaktu kedas pasiente ne’e mai foti nia ai-moruk.
“Ai-moruk Carbamazepine ho sira seluk ne’e ba moras mentál nian, maibé banhira ai-moruk Carbamazepine laiha, iha alternativu mak Sodium Valproate ne’e ba pasiente sira estika an nian, entaun sempre iha alternativu atu espesialista sira bele fó tratamentu ba pasiente,” nia hateten.
Nia esplika, HNGV nia posizaun klaru tanba HNGV hanesan user atu buka armazena no distribui ne’e papél INFPM nian.
“Agora pedidu regulár no komunikasaun ne’e la’o nafatin hanesan baibain, tanba banhira sistema ne’e estoke out la’ós aplika ba pasiente ne’e de’it, maibé ba pasiente sira seluk mós. Bainhira estoke ne’e tama fali mak médiku sira kontaktu sira mai foti ai-moruk. Tanba, pedidu ne’e liuhusi sitema m-suplay no pedidu manuál ba regulár sempre la’o nafatin. Iha Watshap grupu mós la’o nafatin, katak ami iha estoke out favór responde lalais, bainhira sira iha sira responde, maibé sira seidauk iha sira ba buka hodi distribui mai,” nia dehan.
Jornalista : Felicidade Ximenes
Editór : Cancio Ximenes
