VIKEKE, 24 Marsu 2026 (TATOLI)—Koordenadór Laboratóriu Sentru Internamentu Munisípiu Vikeke, Sergio Henrique de Deus, informa mákina teste raan kompletu marka CELL-DYN Emerald 22 ne’ebé avaria hetan ona manutesaun nune’e daudaun ne’e kondisaun di’ak fali ona hodi fó teste ba pasiente sira-ne’ebé presiza teste raan.
“Kona-ba mákina CELL-DYN Emerald 22 ne’ebé aat, foin lalais fulan kotuk ne’e ami rasik mak lori ba nasionál hodi halo manutensaun kuaze loron haat. Konsege hadi’a di’ak fali ona ne’ebé bá lori fali ona iha internamentu,” Sergio Henrique de Deus ba TATOLI, iha Postu Vikeke Vila, Tersa ne’e.
Notísia relevante: Mákina teste raan kompletu iha SSI Vikeke avaria
Sergio hatutan, maski di’ak ona, maibé stok reajente ida naran canser mak daudaun ne’e seidauk iha tanba ne’e mak pesoál laboratóriu sira seidauk utiliza mákina referida.
“Kuandu semana ida-ne’e mak stok reajente tama ona ami bele uza ona mákina teste raan nian,” nia informa.
Rekorda fali katak mákina CELL-DYN Emerald 22 avaria kuanze fulan-ida resin nune’e parte laboratóriu labele utiliza hodi halo teste pasiente sira-nia raan.
Jornalista: Vitorino Lopes da Costa
Editór: Xisto Freitas da Piedade
